Shillong, Naitung 06: Ka jylla Meghalaya kala jam shaphrang ha kaban iaid ryngkat bad ki nongrep na ka bynta ban rep ban riang khlem da pyndonkam ia ka dawai dashin ne Organic Farming, kaba dei ka rukom rep tynrai ha ka jylla.
“La jan 75% na ki nongshong shnong bad ki nongrep kiba donbynta ha ka kam rep kam riang. Ngi don ia ki Mar kiba phylla bad ki mar tynrai jong ka Meghalaya, kiba la khring ia ki iew ha kylleng ka pyrthei khamtam haba ka sorkar kala kyrshan bad pynleit jingmut ha kaban iarap ia ki nongrep kiba rep khlem da pyndonkam dawai” ong ka Myntri ka rep ka riang ka Dr Mazel Ampareen Lyngdoh ha ka Bharat Agri Conclave cum International Buyer-Seller Meet ha Shillong kaba la long hynne ka sngi Saitjain.
Ka jingthmu kaba hakhmat jong katei ka prokram ka long ban kyntiew ia ki marrep jong ka thain̈ shatei lammihngi khamtam ia ki marrep ka Meghalaya. Kane ka prokram ka don ruh ia ka thong ban pyniadei bad ki nongpynmih bad ki nongshna ia ki marbam na Meghalaya bad kumjuh bad ki nongthied kiba na ri India bad nabar ri.
“Kam don kano kano ka jingartatien ba ha ka liang ka rep jhur, ngi dang shaniah ha kaban rep da ki sboh dawai bad suki suki, ka jylla Meghalaya mynta ka dang iaod ryngkat bad ki nongrep ban rep khlem da pyndonkam ia ki sboh dawai, kaba dei ka rukom rep tynrai ha ka jylla” kala ong.
Palat 70 ngut ki nongthied na India bad na 12 tylli ki ri kila wan ban peit bad khmih bniah ia kaba la pyninam da ka jylla. Ha kane ka prokram la pyninam ia bunjait ki marrep kynthup ia ki soh ki bym khlem rep da dawai, ki musli musla, u shynrai, ka ngap rep, u khaw bad kiwei kiwei.
Ia kane ka prokram la pynlong da ka Agricultural and Processed Food Products Export Development Authority (APEDA) ha ryngkat ka jingiatreilang bad ka Department of Agriculture and Farmers Welfare, Meghalaya.
Nalor kane la wan ban iashimbynta ruh da 106 tylli ki FPOs/FPCs, Cooperative Societiy bad ki Producer Group.
Kala banjur ba ka jylla ka don bha ia ka lad ban noh synniang ha ka jingpynmih ia ki marrep ban die ha ki iew ki hat bad wat ha ki iew kiba don ha kylleng ki ri.
Katba u Commissioner ka rep ka riang u Dr Vijay Kumar D ula sam ia ka khubor jongka jingjop halor ka jinglah ban shalan nyngkong eh ia u Sohniatra Khasi ne u Khasi Mandarin (GI) bad u Sohtrun sha ka ri Arab.
Ula pynpaw ba kadei ka jingiohi jngai jongka sorkar jylla ban shim ia kum katei ka sienjam ban khaìì shabar ri ia ki marrep kiba pynmih na ka jylla sha ki iew kiba don shabar ri ban kyntiew ia ka ioh ka kot jongki nongrep.
U Chairman ka APEDA u Abhishek Dev ula pynpaw ba ka Meghalaya ka don ia ka kabu kaba biang bha ban pyniaid iew ia ki marrep ha kylleng ki ri.
Kane ka Buyer Seller Meet ha Meghalaya kala plie lad ia ki nongpynmih bad ia ki nongshna ba kin pyninam ia ki mar ki jongki sha ki nongthied ha ka jylla bad kiba nabar ri.
Ka APEDA kan dang iai pynlong ia kum kine ki prokram ha Arunachal Pradesh, Sikkim, Assam bad ha Bodoland Territorial Council (BTC) ha une u snem mang tyngka uba mynta.
