Ai jingmut ka AKAF ia ka SRP| Kyntiew ia ka bhah ki Khasi Jaintia khlem da ktah ia ka bhah ki Garo

Shillong, Naitung 02 : Ka All Khasi Hills Achik Federation (AKAF) ha ka sngi Ba-ar, kala aiti ia ki jingai jingmut sha ka Expert Committee on State Reservation Policy kaba kdew ia ka jingdonkam ban pynthikna ba ka bhah ki Garo (40%) kam dei ban shah ktah satia.

“..Ngi kyrpad ia ka Expert Committee ban pynneh kumjuh khlem da ktah ia ka Job Reservation ki Garo, na ka bynta ka bha ka miat jong ki lai tylli ki paid riewlum ka Ri-lum Garo, Khasi bad Jaintia bad ruh na ka bynta ka bhah ka miat jong kiwei ki padi riewlum bad ki nongshongshnong ka Jylla Meghalaya” ong u Clivestar Ch Marak ha ka shithi sha ka Expert Committee.

Hynrei ula ong ba ka seng ka ai jingmut pat ia ka jingdonkam ban pynkylla ia ka 20% ka bhah bas ah jong ka Job Reservation Policy lada ka Committee ka dei ban ai jingmut ban pynkylla ia ka Reservation Policy jong ka 12 tarik Kyllalyngkot, 1972.

“Ka Seng ka ai jingmut ba lad aka Committee ka pynleit jingmut ha ka jingkhmih biang/pynkylla ia ka Reservation Policy, ha ka jingsngew jong ngi ngi kyrpad rit ban pynkylla ia ka 20% jong ka Job Reservation Policy kaba mang sha kiwei pat ki paid riewlum bad ka General category da kaba pynkiew sa 8% ia ki paid Khasi bad Jaintia bad ban bhah noh tang 12% ia ki General category bad kiwei ki paid riewlum” ong u Marak.

“Haba kyrpad ban pynkiew 8% kata haduh 48% ka bhah ia ki Khasi bad Jaintia, ka seng ka kyrpad ruhban kynthup lang ia ki paid Garo kiba sah ha kylleng ki bynta jong ka Ri-lum Khasi bad Jaintia kiba la shongshnong pura ha Ri-lum Khasi bad Jaintia” ula bynrap.

U Marak ula ong ba ka daw bad nongrim ba dawa kynthup lang ia ki paid Garo ba sah ha Khasi Hills ka dei-“Namar ka jingiaphiah pud, ki paid Garo bas ah ha Khasi Hills, watla ki paid Garo kila ioh 40% ka bhah hynrei kane ka dei kaba la mang ia ki Garo ba sah ha kylleng ki bynta ka Ri-lum Garo ym ia ki Garo ba sah ha Ri-lum Khasi. Ki Garo kiba sah ha Ri-lum Khasi ki dang sahdien bha ha kiba bun ki bynta jong ka jingim bad ki Garo ba sah ha Ri-lum Garo ki dang shadien bah haba phai sha ka pule ka dangle, ka rukom im bad ki dang sahdien bha ha ka ioh ka kot”.