Shillong, Jylliew 28: Da kaba pyndonkam ia ka (AI), ka Google kala pynbna ia ka jingpynrung ia ki 110 tylli ki ktien ha ka Google Translate, kaba kynthup ia ka ktien Khasi, Cantonese bad katto katne ki ktien na ka ri Africa.
Kitei ki ktien kiba thymmai kiba la pynrung kin mihkhmat naka bynta palat 614 million ngut ki nongkren, kane kan plie lad iaka jingpynkylla ktien ia kumba 8% jong ki paidbah kiba don ha kane ka pyrthei, ia kane la pynpaw da ki nongmihkhmat jong ka Google company.
“Ki don ki ktien kiba ki nongkren ki long palat ia ka 100 million, katba kiwei pat ki ktien kidei ki jong ki jaidbynriew ritpaid bad ki don ruh ki ktien kiba ki nongkren ki duna bha hynrei kadei pat ka jingpyrshang ban pynkhie im biang ia ki”.
Ka jingpynrung ia ka ktien Khasi ha ka Google Translate, kan iarap shibun na ka bynta ki paidbah ka ri bad kumjuh ia ki nongjngohkai kiba na kylleng ki ri kiba wankai sha ka jylla Meghalaya, kaban iarap ia ki ban iakren bad ki trai shnong ha ka ktien Khasi. Watla ha ka jylla kiba bun ki nongshong shnong ki kren ia ka phareng wat lada kam long kaba beit pura bha, da ka jingpyndonkam ia ka Google Translate kan iarap shibun ban kyntiew iaka ioh ka kot lyngba ka kam jngohkai.
Katkum ka Britannica Company kaba la iaid bha ha ka jingthoh ha ka Encyclopaedia ha ka ktien phareng, kila don kumba 900,000 kiba kren ia ka Khasi bad kiwei pat ki ktien kiba kynthup iaka Amwi (War), Synteng (Pnar) band Lyngngam.
Lah ban ong ruh, ba kala don ka jingdawa ba dei ban pynrung noh ia ka ktien Khasi haka Khyrnit kaba Phra jong ka riti synshar ka ri bad kane ka jingdawa ka dang sahteng bad ka sorkar pdeng ba kan ai ia ka jingmynjur.
