Shillong Jylliew 25: Ka Hill State People’s Democratic Party (HSPDP) ha ka sngi Baar kala pypaw ia ka jingdonkam ban kyllum lang noh hajuh iaka bhah thungkam kaba 80 percent na ka bynta ki Khasi-Jaintia bad Garo ban iada na ka jingpynduhlad ne niewbeiñ ia kano kano ka jaidbynriew.
Ha ka dorkhas kaba la phah sha ka Expert Committee halor ka State Reservation Policy, u President ka HSPDP u Bah KP Pangniang ula ong, ba ka donkam ban khmih bniah biang ia ka Reservation Policy jongka 12 tarik u Kyllalyngkot 1972 na ka bynta ka jingroi jingpar ha baroh ki liang ha kaba iadei bad ka thungkam thungjam da kaba buh hakhmat iaka jingdon ia ki jaidbynriew bapher bapher.
“Ka seng ka don ia ka jingsngew ba dei ban kyllum lang noh hajuh ia ka 40%+40% ba kan long noh 80% ia ki Khasi-Jaintia bad Garo khnang ba kan don ka jingiakhun kaba itynnad bad ka jinglah ban treibha ia ka kam ka jam katkum ka jingwan shakhmat hapdeng ki jaidbynriew riewlum ka jylla ki Khasi-Jaintia bad Garos, kaban iada ruh na ka jingpynduhlad bad jingniewbeiñ ia kano kano ka jaidbynriew” ong u Bah KP Pangniang.
Haba kdew ia ka Office Memorandum jong ka 18 tarik u Nohprah 1972 halor ka jingbhah kam ha ki District Level, u President ka HSPDP ula ong, “Ka seng ka ai jingmut ba 90% dei ban ailad shwa ia ki trai shnong jong kata ka district ha ka Meghalaya, da kaba buh jingmut ba ka jingthungkam ha Khasi-Jaintia Hills district kadei ban leit tang sha ki Khasi bad Jaintia, katba ka jingthungkam ha Garo Hills district kadei ban long tang na ka bynta ki Garo.”
Ula ong ruh ba ka seng kala ai jingmut ba dei ban pynduh noh ia ka “carry forward” ne ka jingrah ha u snem ban wan lada kano kano ka jaidbynriew kam lah ban pyndap ia ka bhah thungkam.
“Ha ka para 2 jongka Resolution la kdew “Lada ki duna ki kyrtong na ka Scheduled Tribes and Scheduled Castes kiban shimti ia ka kam, kumta ia katei ka kam kaba thylli yn rah noh sha uwei pat u snem thungkam bad ka jingbhah kam ym dei pat ban rah palat ia ka shi snem. Ka seng ka kwah ba dei ban pynduh noh ia kane ka bynta” ong u Bah Pangniang.
U Bah Pangniang ula pyntip ba ka HSPDP kala ai iaka jingtyrwa sha ka committee ban khmih biang ha kaba iadei bad ka jingpyntreikam ia ka State Reservation Policy halor ka jingbhah ha ka jingpule.
“Naduh ba la ioh ia ka jylla Meghalaya, ka State Reservation Policy jongka 12 Kyllalyngkot 1972, la pyntreikam ia ka Percentage ha kaba iadei bad ka bhah pule ha ki jingpule ki bapher bapher na ka bynta ki Khasi, Jaintia bad Garo. Khlem kano kano ka Section ne Clause kaba biang kaban batai shai ha ka Reservation Policy, kumta ka seng ka sngew ba nakajingdawa ka por dei ban khmih bniah biang halor kane ka mat” ula ong.
U Nongialam ka HSPDP ula ong namar ba kane ka mat kadei kaba iar bad kaba kyllaiñ kumta ka sorkar kadei ban shimkhia bha bad ban shim ia ki sienjam kiba thikna khnang ba kane ka mat kan ym pynthud pat ia ka shongsuk shongshngaiñ ha ka imlang sahlang bad ha ka jylla baroh kawei.
“Watla ki jingai jingmut ki long tang khyndiat, ka seng ka khmih lynti ba kan don ka jingmih kaba bha na ka jingtyrwa kaban wan na ka committee kaba la thaw da ka sorkar” ula pynkut.
