Shillong, June 25: Naduh ba ka jylla kala pyntreikam iaka Roster System ha ka jingthungkam ha ki kam sorkar, baroh ka rukom thungkam kala don hapdeng ka jingkhmih bniah ban pynthikna ba ki paid riewlum ka jylla kim dei ban duh ia ka hok ka jong ki kumba la bhah.
Hynrei ka jingpynbitar kala mih mynta na ki paid Garo halor ka jingthungkam ba dang shen, kaba la saphriang ruh ha ki social media, ha ka kam Assistant Auditor (Assistant Audit Officer) jong ka Administrative Control jongka Directorate of Local Fund Audit, Meghalaya, namar ka jingsngew ba ka don ka jingleh bym hok halor ka bhah ba ki dei ban ioh.
Ki jaidbynriew Garo ki don ia ka jingsngewkhia halor kane ka rukom thungkam namar tang 4 ngut ki samla Garo kila shah thungkam na ka bhah kaba kidei ban ioh 7 ngut na ki 18 tylli ki kam kiba lait. Ha kawei pat ka liang ki jaidbynriew Khasi-Jaintia kila shah thungkam ha baroh 8 tylli ki kam kiba la bhah na ka bynta ka jong ki.
Kila don sa 3 tylli ki post kiba dang sah ban thung ia ki jaidbynriew Garo,kaba ka Meghalaya Public Service Commission (MPSC) kam shym la lah ban thep lut ia ki Garo. Kila pynpaw ba kane ka jingleh kadei kaba la leh shilliang khmat bad kadei ka jingthmu ban pynrungkam tang khyndiat ngut eh ia ki Garo ha ki kam sorkar.
Ka Meghalaya Public Service Commission (MPSC) kala ‘pynmih ia ka jingpynbna ba lait kam haduh 18 tylli ha kakyrdan Assistant Audit Officer ha ka 21 tarik u Nailar 2023, ia kaba dei ban iaid katkum ka roster system ka jylla. Kumta 8 tylli ki Post la bhah bad leit sha ki Khasi-Jaintia, 7 tylli ia ki Garo bad kawei naka bynta ki Other Scheduled Caste (OSC) bad Other Schedule Tribes (OST) jongka jylla bad 2 tylli la bhah na ka bynta ka Unreserved Category.
Hynrei haba la pynbna iaka result ha ka 14, Lber 2024, tang 4 ngut na ka jaidbynriew Garo kila mih kyrteng ha ka thup iohkam bad kam shym la mih kyrteng eiei na ka OSC bad OST. Haduh 8 ngut kila mih kyrteng na ka Khasi-Jaintia bad 2 ngut ha ka Unreserved Category
Ka MPSC kala pynshai ha ka result ba dei tang 4 ngut na ka jaidbynriew Garo kiba dei hok ban iohkam bad ym shim la kynthup mano mano ruh na ka OST bad OSC category.
Ki jaidbynriew Garo kila pynpaw ia ka jingsngew diaw halor katei ka result namar ka jingbym shym la pyndonkam lut iaka bhah ka jong ki.
Ki tyllong khubor na ka sorkar kiba tip bha ia ka jinglong jingman ha ka rukom thungkam, kila pynpaw ba ki jaidbynriew Garo kim dei ban khuslai namar ba ia kitei ki kam kiba lait yn sa advertise biang sa shisien.
Ka State Reservation Policy, 1972 kala kdew shai ba lada don kano kano ka jingduna ne jingbymbiang ha ka rukom bhah, yn sa rah biang iaka sha u snem ban wan.
Ha ka Clause 2 jong ka Meghalaya State Reservation Policy, 1972 la kdew, “Lada ym lah ban pyndap ia ka bhah thungkam ia ki kyrtong na ki Jaidbynriew ba ioh bhah, ia ka kam kaba dang lait lah ban pyndap noh da kiwei pat. Hynrei lada don pat ka jingduna na ki Scheduled Tribe bad Schedules Caste, ia kane ka kam ba lait yn sa rah pat sha uwei u snem thungkam tangba ia kane ka bhah ym dei pat ban rah palat ia ka shisnem. Hadien ka jingkut noh jong u snem baar, ia kitei ki jingbhah la lah ban pynkut noh. La rai ruh ba kam dei ban don kano kano ka por ba ka nombar jong ka ‘Normal Reserved Vacancies’ bad ‘Carry Forward’ kin tam pat ia ka 90 percent ha ka jingdon jong baroh ki kam kiba lait ha uta u snem”.
Ka tnad Personnel kala pynmih ia ka jingpynshai ba dang shen ka MPSC ha ka ‘Advertisement’ ka dei ban kdew shai ia ka Pass Marks kaba dei ban ioh katkum ka Service Rules khnang ba ki kyrtong kin tip ia ka marks kaba ki donkam ban ioh. Kumba long mynta ka Pass Mark ka long 40 Marks.
 jong ka Administrative Control jongka Directorate of Local Fund Audit, Meghalaya, namar ka jingsngew ba ka don ka jingleh bym hok halor ka bhah ba ki dei ban ioh.){kind=link}