Shillong, Jylliew 19 : Ka Kynhun Myntri ka Sorkar Jylla kala ai jingmynjur ban thung ia i kong Iamonlang M Syiem kum ka Chairperson ba thymmai jong ka Meghalaya State Commission for Women (MSCW) haba kyntiew ruh ia ka rta treikam sha ka 70 snem.
Haba pyntip ia kane hadien ka jingialang ba long hynne ka sngi Balang, u Myntri ka Tnad Social Welfare Bah Paul Lyngdoh ula ong “La thung ia i Kong Iamonlang M Syiem da ka jingmynjur ka Kynhun Myntri kum ka Chairperson ba thymmai ka Meghalaya State Women Commission”.
“I (Kong Iamonlang) ila shemphang bha ha ka kam ai jingiada ia ka hok ki Khynnah bad Kynthei bad I dei ruh I Chairperson ka Meghalaya State Commission for Protection of Child Rights (MSCPCR)” ula ong.
I Kong Syiem iba dei ruh i Associate Professor bala shongthait bad Head of Department barim ka tnad Sociology ha St Edmund’s College, I dei iwei napdeng ki 7ngut kila thep kyrteng ban shimti ia kane ka kam.
Haba kylli, u Bah Paul ula ong “Kan nang iarap ban pynkhlain ia ka jingtreikam lang jong kine ki artylli ki tnad ba kongsan. Ngi donkam ia ki Nongialam kiba ngim don ha ki snem bala leit noh bad mynta ngi la ioh ia I briew iba la shemphang bha ha ka kam iada ia ki kynthei bad khynnah”.
“Halor ka jingkynjoh 65 snem ka rta, ka samoi treikam jong I kong Iamonlang M Syiem kum i Chairperson ka State Committee for Protection of Child’s Rights, kala kut noh naduh ka 1 tarik Lber, 2024. In shimti noh kum i Chairperson ka State Commission for Women da ka jingmynjur jong ka kynhun Myntri mynta ka sngi” ula bynrap.
Ha kajuh ka por, u Bah Paul u pyntip ba ka Kynhun Myntri kala mynjur ruh ia ka jingtyrwa ban pynheh ia ka rta ha ka jing thungkam ia i Chairperson n aka 65 snem sha ka 70 snem.
“Ngi la pan jingmut na ka Tnad Ain bad ngi la ioh ia ki jingai jingmut na ka Tnad ha ka kyrdan jong u Advocate General ka Sorkar Meghalaya” ula bynrap.
