Shillong Jylliew 15: Ka Joint Action Committee ki artylli ki seng, ka East Jaintia Hills Truck Owners & Transporters Association bad ka East Jaintia Hills Limestone Suppliers Association, ha ka sngi Thohdieng kala dawa ia ka Sorkar ba kan shimkhia katkum ki kyndon aiñ halor ka jingkit palat pud jong ki trok kiba dei iaid lyngba ka NH-6, kaba la pynlong ia katei ka surok ban sniew.
Ia kane ka jingdawa la buh hakhmat u Deputy Commissioner ka East Jaintia Hills District haba kdew ba ka surok kaba jur eh ka jingsniew ka dei ha ki thaiñ Elaka Narpuh, ha kaba ka surok kala jot rathai bad buh ha ka jingeh bad jingma kaba khraw ia ki paidbah nongleit nongwan khamtam kiba pang ba shitom.
Ka Joint Action Committee, kala iakren sani bha ruh bad u Deputy Commissioner ba kumba long mynta lah shitaiew tam, ka jingsniew jong ka NH-6, khamtam ha ki thaiñ Narpuh ka long kaba i sangsot haduh katta katta, kat haduh ba kala don ka jingdheng kali kaba shyrkhei da ki phew kynta ha kitei ki thaiñ khamtam ha ki thaiñ Ratachera bad Tongseng.
“Ka daw baroh jong kane ka dei na ka jingioh kit palat pud ba laitlan jong ki trok ba dei iaid lynti lyngba kane ka surokbah. Ka jingkit palat pud jong ki trok kala buh ruh ha ka jingma kaba khraw ia ka jingkieng Narpuh Sunapur bad ka Ripnar Samasi” ong u President ka Joint Action Committee, u Bah Loveyou Bareh bad u Secretary u Bah Deolangki Dkhar ha ka kyrwoh khubor.
Ka JAC kala pynkynmaw, ba ka NH-6, kadei u thied snam ba kongsan jong ka thaiñ Shatei-lammihngi jong ka Ri India bad ka Joint Action Committee jong kitei ki ar seng, ha ka 22 tarik u bnai ba la dep, kala pynlong ia ka jingkhynra naphang ia ki trok kiba kit palat pud ha Kongong, Wapungshnong bad ruh ha Tongseng ha ryngkat ka jingiadonlang jong ki bor sorkar ba dei peit, kiba kynthup naduh ki Majistor, pulit, ki sahep sorkar bad kiwei kiwei. La iathuh baha katei ka jingkhynra, ka JAC kala bat bad pynphai noh ia shibun bah ki trok kiba kit palat pud.
Ka JAC kala pynpaw ba ha ka jingiakren bad u Deputy Commisioner, na ka bynta ka bha ka miat jong u paidbah baroh kiba pyndonkam ia ka NH-6, khamtam eh ia ki nongshnong shnong jong ka East Jaintia Hills District, ka Joint Action Committee, kala dawa tyngeh na ka sorkar bad bad ki bor district ba dei ban pyntrei kam hok noh ia ka Motor Vehicle Act, 1988 bad ka Prevention of Damages to Public Properties Act, 1984, ha ryngkat ki jingbyrngem ba lada jia ba ka sorkar kam lah ban tehlakam ia kane ka jingkit palat pud jong ki trok, ka Joint Action Committee kan sa shim pat da kawei ka rai kaba tyngeh.
