Nongstoiñ, Jylliew 14: Ka jingshah tuh Masi bad shah tuh Muid ha ka thaiñ West Khasi Hills District, ka la sdang ban jyllei bha ha kaba ki nongri jingri ki la khie bitar, namar ka jingjah ki jingri jingdup jan man ka taïew.
U nongthoh khubor u la pynthikna ia kane da kaba lum jingtip na ki shnong bapher bapher, kiba la pyntip ba ki don bun ngut ki nongri jingri kiba la mad ïa kitei ki jingeh.
Uwei na ki nongshongshnong ka shnong Siejlieh ha Nongstoiñ, bah Tarly Nongsiej u ba ju ri muid da ki phew snem, u la ïathuh ia ki jingjah rngai ki muid ia kiba u ong ba kum kane ka jingjia kam pat ju jia satia mynno mynno ruh. Ula ong ba kane ka dang dei sien kaba nyngkong ha kaba u la shah tuh haduh shi jur ki muid ha ka 7 tarik mynta u bnai Jylliew 2024.
Ha ka 12 tarik Jylliew 2024, ka shnong Tiehbah ka la ïoh ban kem ïa ki ar ngut ki nongtuh Masi ha ka step synnia katba kine ki nongtuh masi ki dang thmu ban rong tuh ia ki masi.
La iathuh ba kitei ki nongtuh ki la wan kumba 7 ngut ei ei, uwei u ba la wan da ka kali pickup, uwei pat da ka kali maruti bad san ngut ki la wan da ki kjat haduh shnong ban tuh ïa ki Masi. Ïa kane la pynshisha lyngba ka jingphla jong kitei ki 2 ngut kiba la shah kem noh hadien ka jingïabeh kthong kaba jur.
Ha kane ka jingjia, ka Shnong kala lap pat haduh 20 tylli ki masi kiba shah tuh, kiba dei jong u bah Ridingstar Wanniang sordar shnong Tiehbah.
Haduh ba thoh ia kane ka khubor, ki don haduh 4 ngut ki nongtuh masi kiba la ioh ban kem bad kine ki kynthup ïa uwei u ba shong basah ha Rambrai, uwei ha them ïew Nongstoiñ, uwei na Kynshi bad uwei u ba na Nongmyndo Tiehbah.
Hadien ba la tian bishar da ka shnong ryngkat kiwei kiwei ki trai Masi kiba la ju shah tuh teng kiba la wan lang ha katei ka shnong, ka la poi noh sha ka jingïapynbeit ban ïa suk bad la wan shaw noh da ki ba haïing jong kitei ki briew.
La ong shuh shuh ba dang don shuh shuh sa kiwei pat ki nongtuh kiba dei na ka thaiñ jong ka sor Shillong, kiba ju don kti ha kum katei ka kam tuh hynrei ym pat lah ban ïoh kem haduh mynta.
