Tura, Jylliew 10 : Ka shuki MLA jong ka Gambegre kan sa iohi ia ka dur thymmai naba u MLA ba mynta Saleng A Sangma, ula iehnoh kam hynne ka sngi Nyngkong ban shakri noh ia ki paidbah kum u MP ka Lok Sabha na Tura Constituency.
U Saleng ula aiti ia ka shithi iehnohkam sha u Lamphang ka Iingdorbar Thaw Ain ka Jylla hynne ka sngi Nyngkong.
Ia ka shithi iehnohkam la phah sha u Lamphang Thomas A Sangma bad la aiti sha ka Meghalaya Assembly Secretariat hynne ka sngi Nyngkong ha ka por 11:46 baje mynstep.
Kane ka jingiehnoh kam jong u, kala nang pynduna paid ia ka jingdon MLA ka Congress ha Iingdorbar Thaw Ain ka Jylla, khamtam ha Ri-lum Garo ka bym don shuh ia ki Nongmihkhmat hapoh ka Iingdorbar Thaw Ain.
Ka jingjop u Saleng ha ka elekshon Lok Sabha na Tura Constituency kala pynduna ia ka jingdon MLA ka Congress sha ka 4 ngut-kaba iaryngkat mynta bad ka seng riewlum Voice of the People Party (VPP).
Kane ka plie lynti ruh ia ka jingiakhun ia ka by-election ha Gambegre Assembly Constituency, West Garo Hills, kaba la bat da u Saleng haduh 4 samoi.
Ia u MLA ba thymmai yn sa jied lyngba ka by-elekshon ka ban long hapoh ka 6 bnai, kaba long kat kum ka kyndon jong ka Election Commission of India (ECI).
