Nongpoh, Jylliew 06 : Kawei ka trok kit coke, kala kylla lyndang ha surok NH-6 ha Nongpoh hynne ka janmiet sngi Palei, na ka daw ka jingkiar ia kawei ka kali rit.
Kane ka trok ba don u nombor NL01-AD-4856, ka dei kaba dang hiar sha ka thain Guwahati ban leit pynhap ia u coke.
Kat kum ka khubor Pulit la iathuh ba mar syn poi ha lad mar pyrshah ka Ophis u Deputy Commissioner ka Ri-Bhoi, Nongpoh, kane ka trok kala kylla noh hadien ba kawei ka kali rit kala jam kynsan na kawei ka surok sha kawei pat khlem da ai dak. Ki ong ba ha ka jingkiar ia kane ka kali rit, kane ka trok kala kylla bad thiah lyndang.
Ki iathuh ba donbok ba ha kane ka jingjia, ym shym la don kano kano ka jingmynsaw kaba jur.
Kane ka jingjia kala wanrah ia ka jingdheng kali kaba jur ha kane ka surok namar ka jingsaphriang lut u coke ha baroh kawei ka surok. Ki Pulit kila hap ban pyndonkam sa ka service road ban lah pyniaid ia ki kali.
Ki Pulit ha ryngkat ka NHAI kila pynkynriah noh ia kane ka trok bad kila khat ruh ia u coke ba hap ha surok ban ioh iaid biang ki kali. Ki Pulit kila register case halor kane ka jingjia bad ka jingtohkit mynta kala iaid shakhmat.
