Shillong, Jylliew 04 : Ki paidbah ka Jylla Meghalaya kila pynpaw shai kdar ia ka rai jong ki bad phah ia ka khubor kaba tyngeh ia ki Seng Sain Pyrthei ba Synshar lyngba ki Vote jong ki, naba baroh artylli ki Liang Pyrshah kila ioh khur ia ka jingjop ha ki artylli ki Parliamentary constituency ka Jylla.
Ha Shillong, ka Voice of the People Party (VPP) kala thaw histori da ka jingpynliem ia u MP ka Congress Bah Vincent H Pala haduh 3,70,000 vote da ka jingioh vote ba kot haduh 568,000 vote.
Ha Tura, u MLA bad Kyrtong ka Congress Saleng A Sangma ula pynkut ia ka jinglong nongmihkhmat ba 47 snem na ka Longiing u (L) Purno A Sangma, da ka jinglah pynliem ia ka Khun bad MP, ka Agatha K Sangma. U Saleng ula ioh haduh 383919 vote katba ka Agatha kala ioh tang 228678 vote, kaba pynlong ia u Saleng ban jop palat 150,000 vote.
Haduh 1642761 ngut ki nongthep vote kila iathep vote ha kine ki artylli ki constituency ka Jylla kaba la long ha ka 19 tarik Iaiong, 2024.
Ha Shillong Lok Sabha seat, ki don haduh 1,400,411 ki nongthep vote jong ka elekshon Lok Sabha 2024. U kyrtong ka VPP marwei Dr Ricky Syngkon ula ioh palat 568,000 vote katba u Bah Vincent Pala uba la mihkhmat haduh 4 samoi kum u MP ka Shillong, ula ioh palat 197,000 vote.
U Bah Pala ula ioh 419,689 vote kaba long 53.52% na ka jingioh vote ha ka elekshon Lok Sabha 2019. Hynrei ia kane ka record la tam mynta da u kyrtong ka VPP Dr Ricky Syngkon uba la ioh aplat 568,313 vote kaba long haduh 58% na ki vote bala thep.
Ka daw ba hakhmat eh jong ka jingjop ka VPP ha Shillong-I ka dei namar ka jingdon ka mynsiem ka jingbym sngewtynnad shuh ki paidbah nongthep vote ia ka Sorkar.
U President ka VPP Bah Ardent M Basaiawmoit, ula bam smai ban iai bteng ia ka jingiakhun pyrshah ia ka bamsap, ka jing jied bahaiing, paralok bad ia ka jingduk, kaba sngew iahap ia ki nongthep vote ka Shillong-I ia kaba la paw na ka result jong ka elekshon.
Katba ha Tura-2, ka National People’s Party (NPP) kala mad ia ka jingjakhom namar ka jingiatehlok bad ka Bharatiya Janata Party (BJP).
Ka slogan “Kawei ka Vote ia ka Agatha ka dei kawei ka Vote ia u Modi” kala shim ia ka bynta kaba khraw bha ban khrung ia ki nongthep vote ba kin ai ia ki vote jong ki sha u Saleng A Sangma jong ka Indian National Congress (INC).
Katba kane ka elekshon Lok Sabha kala pyni ba ki paidbah ka Ri-lum Khasi kim shym mon shuh ia ka National People’s Party, ka jingkylli ka mih mynta ba hato ka NPP kan lah khie khlieh biang hadien ka jingshah pynliem ha Ri-lum Garo.
