Nongpoh, Jymmang 29 : Ka Wah Umtrew, Byrnihat ka dei ka wah kaba shim bun tam ki mynsiem briew (bam riew) na ka jingngam jyllop bad shah rong um namar ka daw jong ka jingkhein sting jong ka Tnad Meghalaya Energy Corporation Limited (MeECL) kaba leh bym patiaw ia ki mynsiem briew.
Kane ka Wah sharum jong ka Dam Umtrew kaba iaid lyngba ka shnong Panitola bad Narbong, ka dei kaba ju iap briew beit manla ka por bad khlem samoi bad kiba bun na kiba iap, ki dei ki nongwan shangkai pynngad bad ki nongwan bam khana na Assam.
Dang ha kine ki khyndiat sngi, kane ka wah kala shim ia ka jingim jong uwei u samla na Assam, uba la ngam jyllop haba jngi namar ka jingpyllait um kynsan kynsan na ka Dam.
Ka thain Byrnihat hi ka dei ka jaka kaba shit kyrang bha ka sngi bad ki nongleit kai ki ju sngewtynnad ban ngam ha wah ban pyn pynngad ialade hynrei phewse na ka jingsngewtynnad, bun ki khep kila poi pynban sha ka jingsngewsih.
Kiba bun ki jingiap briew ki dei na ka jingpyllait um na ka Dam bad ka daw hi la shem ba dei imat ka jingsarang jong ka siren ka MeECL ka bym ju sawa satia hashuwa ban pyllait um.
Kaba thamula ka long ba ka MeECL kaba tip bha ia ka jingwan shangkai bad wan picnic ki nong Assam harud kane ka wah, kala buh ia ka signboard ba thoh shai ba haba sawa ka siren, ki briew ki dei ban mih noh na wah namar kan don ka jingpyllait um.
Ka Shlem haba iakren bad u Rangah Shnong ka Narbong, Byrnihat u Romen Ronghang bad u Rangbah Shnong ka Panitola Amit R Marak, kila pynpaw ia ka jingsngewkhia kaba jur halor ka jingkhein sting ka MeECL ia ka jingim ki briew. Kila pyntip ba ym lah niew shuh ia ki nongwan kai sngewbha na Assam bad Meghalaya ruh, kiba la ngam jyllop ha kane ka wah na ka jingpyllait um na Dam.
Kila iathuh ba ha ki snem bala leit noh, kum kine ki jingiap ki briew ba wan kai sngewbha, kam ju kham jia koit ha kane ka wah namar ka jingpynpah siren jong ka MeECL shuwa ban pyllait um. Ki iathuh, ka MeECL ka ju pynpah haduh arsien ia ka siren shuwa ban pyllait ia ka um hynrei mynta, kane ka jingpynpah siren kala jah bad kam ju don shuh.
“Ka Wah Umtrew kala sdang bna nam bha bad kala sdang kiew bha ha ka jingwan kai pynngad bad wan picnic jong ki briew na kylleng ki jaka khamtam na Assam. Ki bun kiba wan bad ki bahaiing hasem bad ki ju pynlut por ban pynbyrngia bad pynpynngad ialade da kaba sum ha kane ka wah” kila ong.
“Hynrei ka jingiap briew ba khari khari khamtam ki nongwankai sha kane ka rud wah, kala pynbna nam sniew ia kane ka thain…baroh ki ka dei tang namar ka daw jong ka MeECL” kila kkynthoh.
Kine ki Nongialam Shnong kila kyntu ia ki bor khmih ka MeECL ba kan shimkhia lang ia kane ka bynta bad ban pynthikna ba ka jingpynpah siren haba pyllait um, kan treikam biang noh khnang ban shngain ki nongleit kai sngewbha sharud jong kane ka wah.
