Jorhat, Jymmang 28: Ka District Disaster Management Authority kala ai ka jingmaham kaba tyngeh na ka bynta ki nongshong shnong ka thaiñ Jorhat bad Majuli Districts ha ka jylla Assam na ka jingkhie jong u Cyclone Remal.
Une u Cyclone, uba la sdang khie na ka Bay of Bengal, la khmih lynti ba un wanrah ia u lapbah lapsan bad ia ka eriong kaba jur ha ka thaiñ.
Ka India Meteorological Department (IMD) kala pynmih ia ki jingpynbna kaba kdew shai kdar ba u Cyclone Remal ula iaid sha ka thaiñ lammihngi ba u lah ban ktah jur ia ki bynta jong ka jylla Assam, kaba kynthup ruh ia ka Majuli district.
Halor katei ka jingpynbna, ki bor pyniaid district kila shim ia ki katto katne ki sienjam ban tehlakam ban lait na ki jingjulor bad jingduh ia ki mynsiem briew bad ia ki jingdon jingem.
Ka Inland Water Transport (IWT) Jorhat Majuli Division kala ioh ia ka jingbthah ba kadei ban peitngor bha ia ka jinglong jingman ha ka 28 bad 29 tarik u Jymmang.
Baroh ki kam khaii pateng bad ki jingai jingshakri lyngba ki lieng la bthah ban pynsangeh noh mardor hapoh jong ka Majuli district lada donkam bad baroh ki lieng jong ki riewshimet la mana ba kin ym treikam. Hynrei la pyllait tang ia kito ki lieng kiba kit ia ki marbam mardih, kiba leit ai jingiarap ia ki lanot bad lada ka jinglong jingman ka dang sniew, la bthah ruh ba dei ban pynjlan iaka katei ka jingpynsangeh treikam ia ki lieng ban kit briew.
La khang pyrshah ruh ia ki nongtong dohkha ba kin leit tong dohkha na ka wah Brahmaputra bad ki wah kiba marjan ha ka 28 haduh ka 29 tarik u Jymmang ban pynthikna ia ka jingshngain jong ki nongtong dohkha ba kin lait na kino kino ki jingjia kiba sngewsih.
Ka Tnad ka rep ka riang jongka Majuli kala ioh ia ka jingbthah ban khang pyrshah ia ki nongrep ba kin leit rep riang ha kum kane ka por khnang ban lait na kino kino ki jingjulor bad jingjia ba sngewsih.
La bthah ruh ia baroh ki Circle Officer, Block Development Officer bad ki ophisar na ka tnad Fishery and Agriculture Department ha Majuli kidei ban pyntreikam tyngeh ia kitei ki hukum jingbthah.
La pynmih ia kitei ki jingbthah bad ki jingmana kadei da kaba buh hakhmat ban lait na kino kino ki jingjia kiba sngewsih na ka jingkhie u Cycylone Remal.
U Cyclone Remal ula dep ban khie ha West Bengal bad Bangladesh, ha kaba ula pynjulor bad shim ruh ia ka jingim briew.
Ka IMD kala pynmih iaka jingpynbna ba kan don ka jingther u lapbah lapsan haka thaiñ shatei lammihngi jong ka ri kaba kynthup ia ka jylla Assam ha kine ki sngi ban wan.
La bthah ia ki nongshong shnong ba kidei ban long kiba husiar bad kiba peitngor bad ban shim ia ki sienjam kiba kongsan ban iada ialade bad ia ka jingdon jingem ka jongki.
