Shna lieng u samla ha thain Polo
Shillong, Jymmang 28 : Ka jingther u slap bad ka eriong naduh ha kine ki arsngi, kala wanrah ia ka jingtwa khyndew kaba shyrkhei ha ka thain Shillong-Mawlai By-pass.
Kane ka jingtwa khyndew kala jia hajan jong ka skul Grace Academy. La iathuh ba ka jingtwa khyndew kala jia hynne ka step 28 tarik ha ka por 5 baje eiei.
Watla kam shym la don kano kano ka jingjia ba sngewsih, hynrei la ioh jingtip ba 4 ngut ki briew kila mynsaw na ka jing shah rat ha ka khyndew kaba leit hap sha ka iing ba ki sah.
Kane ka jingtwa khyndew kaba buh jingma ruh ia kawei ka jingtei (Building) kaba jrong ha kane ka thain, namar ka jing nang shong synjor ka khyndew kaba ikop ban khyllem noh.
Kumjuh ruh, kane ka jingther u slap kala wanrah ia ka jingshlei um kaba shyrkhei ha ki thain Langkyrding, Pynthorbah, Sawforlong, Polo, Demseiniong.
Ka Um jong ka Wah Umkhrah ruh kala kiew kynsan kynsan bad ki don ki jaka them khamtam ha Polo bad Mawlai, ka um kala kiew wat sha ki iing briew.
La sakhi baka surok ban leit sha ka skul BDW bad LEADS kala shah tap um bad kila don ruh ki kali kiba la sahkut.
Uwei u samla ha ka thain Langkyrding ula shna ia ka lieng da ki siej bad ki phong ban king kieng ha ka lynti iaid kaba la shlei um.
