Bthah ia ki DC ba kim dei ban thiah bad ban peitngor baroh 24 kynta
Shillong, Jymmang 27: Ka sorkar Meghalaya kala shim ia ki lad ki lynti bad ki sienjam bapher ban pynthikna ba kan don ka jingshngaiñ ia ki nongshong shnong ka jylla hadien ba kala don ka jingther u lapbah lapsan bad ka eriong na ka jingkhie ka Cyclone ‘Remal’.
Haba iakren bad ki nongthoh khubor hadien bala wai ka jingialang, u Symbud Myntri Rangbah ka jylla Bah Prestone Tynsong ula ong ba ka sorkar jylla kala long kaba la pynkhreh ha kaban shimkhia ia kino kino ki jingjia kiba mih na ka jingther u lapbah lapsan.
“Ngi la long kiba la pynkhreh bha, la ka long ha ka liang ka pisa tyngka ne ha ka bor met, la ka long ha kano kano ka dur ruh, ngi lah long kiba la pynkhreh. Ngi lah dep ban ai ka jingbthah ia baroh ki kynhun, la ka dei ki bor ka sorkar, ki seng trei mon sngewbha ne kino kino kiba donbynta lang ha ka kam haduh ki shnong ki thaw, ba kin ai ia ka jingiatreilang bad ki bor sorkar” ula ong.
U Bah Prestone ula kyntu ia ki nongshong shnong ba kim dei ban sheptieng, “Ka jingiathuh lypa ka long ba kane ka Cyclone yn iai bteng haduh lashai ka sngi. Ngi lah dep ban bthah ia baroh ki DC ba kim dei ban thiah hynrei ban treikam baroh 24 kynta katba dang iaid kane ka cyclone.”
“Ha ki katto katne ki district, ngi lah ban long kiba don jingma bad ngi lah dep ban ai ka jingbthah ia ki bor pyniaid district ba ki dei ban long kiba peitngor bad ba kin trei bha ia ki kam ki jam jongki” ong u Symbud Myntri Rangbah.
Katkum ka jingiathuh u Symbud Myntri Rangbah ula ong ba ka East Jaintia Hills, West Jaintia Hills, South West Khasi Hills, West Khasi Hills, East Khasi Hills, Eastern West Khasi Hills kin dei ki jaka kiba lah ban don ha ka jingma.
Halor ka jingkylli la ka sorkar kan bthah ba dei ban phah khang khyrdep ia ki skul, u Bah Prestone ula ong, “Ngi lah iakren halor katei ka mat bad ngi ieh ha ka jingstad jong ki bor pyniaid district ha ryngkat ka jingiasyllok bad ki SDSEO ba kin shim ia ka rai kaba kongsan halor katei ka mat. Ka sorkar kam don eiei ban ong halor kane hynrei ka jingbthah ia ki bor pyniaid district ka long ba kidei ban shim ia ki sienjam bad ia ki rai katkum ka jingsngew donkam ka jongki”.
Ha kaba iadei bad ka jingshlei um namar ka jingbym don ia ki nala kiba biang, u Bah Prestone ula ong, “Ngi la donkam ban don ia ka jingiatreilang hapdeng ka tnad Urban Affairs, SMB bad ka tnad PWD Roads, Ngi dang iasyllok bad ngin sa shim ia ki sienjam kiba kongsan”.
Ula ong ba ka sorkar kala dep ban shna ia ki nala ha baroh arliang jong ki surok kiba don ha Demseiniong bad ha kiwei kiwei ki jaka kiba don ha ka nongbah Shillong.
U Bah Prestone ula pyntip ruh ba ka sorkar kala dep mang T.20 Klur naka bynta kawei pa kawei ka district ban pynbiang mardor ia ki jingdonkam na ka bynta kito ki lanot kiba shah ktah ha ka bor mariang .
Ha kaba iadei bad ka jingdon jingma jong ki dieng kiba la tlor kiba lah ban khyllem noh, u Bah Prestone ula ong, ba ka tnad Forest ka don ia ka jingkitkhlieh ban ithuh ia kitei ki dieng.
“Haba phi kren shaphang ka jylla Meghalaya ki don bun ki khlaw kiba hap hapoh ka jingkhmih jong ki Syiem, Raid bad kumta halor kane ka bynta ruh ngi donkam ban iatai sani bad baroh kiba don byntalang bad ban ithuh khnang bay n lah ban pynkhllem noh ia ki dieng kiba la don jingma kiba ki lah ban khyllem hi noh” ong u Bah Prestone.
