SHILLONG, MAY 22: Ka Women’s Wing jong ka National People’s Party (NPP) hynne ka sngi Balang, kala ai ka jingiaroh ia ka sorkar jylla halor ka jingshim ia ka rai ban thung ia ka Kong Idashisha Nongrang, kaba dei ka Longkmie kaba nyngkongduh ban shimti ia ka shuki kum ka Director General of Police (DGP) ka Meghalaya.
Katei ka kynhun kaba la ialam da ka President ka National Peoples’ Women Front (NPWF) ka Dr Jasmine Lyngdoh, kila iakynduh bad pynkup burom ia u Symbud Myntri Rangbah ka jylla uba khmih ia ka kam pohiing Bah Prestone Tynsong kum ka dak jong ka jingsngewnguh ia ka sorkar jylla.
“Ngi wan ban pynpaw ia ka jingsngewnguh ia u Symbud Myntri Rangbah ka jylla uba khmih ia ka tnad pohiing uba la thung ia ka Kong Idashisha kum ka longkmie DGP ba nyngkong ka Meghalaya, kaba dei ka kyrdan kaba kongsan bad ngi lah iohi ruh ba kane ka sorkar kadei kaba ai ia kiba bun ki kabu ia ki kynthei jong ngi ban pyni ia ka jingtbit ka jongki bad ia mynsiem jong ka jingtrei shitom bad ka jingshngain ia ki kynthei kaba don bha hangne namar ka jingthung kaba kila leh. Ngi dap da ka jingkmen ba ka sorkar kala shim ua ki sienjam kiba khlain bad iohi ia ka jinglah jong ki longkmie, kiba long ki nongialam kiba tbit bad kiba lah ban ai ka jingshakri kaba bha tam” ong ka Dr Jasmine haba iakren bad ki nongthoh khubor.
“Kumba ngi tip, ka Kong Idashisha kala pynbna ban sdang ban wanrah ia ki jingkylla ha ka tnad pulit bad kan iakynduh ruh ia ki paidbah, kan pynleit jingmut bha na ka bynta ka jingsuk bad jingshngain ki kynthei bad kine kidei kiei kiei kaba ngi kum ka National Peoples’ Women Front ngi da sngewkmen shisha ba kin urlong” kala ong.
Kala pynpaw ruh iaka jingshaniah skhem ba ka DGP ba thymmai ka jylla kan shimkhia ha kaban pynthikna iaka shongsuk shongshngain jong ki kynthei ha ka jylla.
“Ka jingkiew ki kam thombor ia ki kynthei bad longkmie, ngi tip ba kadei kaba jia ha kylleng satlak ka pyrthei hynrei ngi sngewthuh pat ba da ka jingdon ka longkmie kum ka DGP kan shimkhia bha ha kiba bun ki bynta ha kaba wat ban pynthikna ba kiba leh ia ki kam sniew kin shah kem mardor bad ynshim ia ki sienjam na ka bynta ka jingshngain ki longkmie” la bynrap ka Dr Jasmine.
 ka Dr Jasmine Lyngdoh, kila iakynduh bad pynkup burom ia u Symbud Myntri Rangbah ka jylla uba khmih ia ka kam pohiing Bah Prestone Tynsong kum ka dak jong ka jingsngewnguh ia ka sorkar jylla.){kind=link}