Guwahati, Nailar 09: Ka kynhun seng lehnoh ka ba don ia ka ktem na Bangladesh, ka Ansarullah Bangla Team (ABT) ka la pynkylla ia ki rukom treikam jong ka lyngba ki chat app sha ka ‘Dark Web’ na ka bynta ki kam ai jingtip sha ki dkhot jong ka khnang ban ym lapdien ia ki rukom treikam ka jong ki, ong ka khubor heh pulit.
Kane ka jingphla da ki heh pulit ka Assam ka la wan long hadien ka jingioh kem ia kawei ka kynthei, ia ka ba la tip kyrteng kum ka Jahura Khatun namar ka jingdon jingiadei bad ka kynhun ABT ka ba dei na Naeralga ka ba hapoh Dhubri district ka Assam.
“Ha ka jingtohkit la shem ba ki dkhot jong kane ka kynhun ABT ki la pyndonkam da ka ‘Dark Web’ lane ‘Dark Net’ na ka bynta ki kam aijingtip sha ki para dkhot jong ka kynhun, ban pynrung dkhot bad ban ialap bad pynphriang ia ki jingtreikam jong ka, ban pynmih pisa bad ban iasylla halor ki kam thombor,” ong u SP ka Dhubri, u Abhijit Gurav.
U Gaurav u la ong ba ka dark web ka thew ia kino kino ki jingthoh ne ki jingtip ia ki ba ym lah ban lap da ki kor ki bor bad ka ba donkam da ki software ki ba kyrpang lane tang lyngba ka jingioh bor na ka bynta ban lah ban pyndonkam ia ka.
U la ong ba ki bor pulit ki la ioh ban kurup artylli ki mobile phone na katei ka kynthei ka ba la shah kem, kawei na ki ka ba la sniew noh namar ka jingbam jong ka ding hadien ba kawei na ki dkhot ka longiing jong ka, ka la kawang noh ia ka hapoh ka ding ha ka por ba ki la leit ban kem ia ka.
Ia kane ka mobile ruh la kurup noh da ki pulit ha ka ba na ki liang ki riew shemphang ka tnat pulit ki la lapksai halor ka jingiadei ka jong ka bad kiwei pat ki dkhot lyngba ki apps ki bym lah ban tip.
U Gaurav u la ong ruh ba kine ki sakhi satar ba la ioh lum lyngba kane ka mobile phone ka pyni ba ka Khatun ka ba la don mynta hapdeng ka jingshah tohkit ka la iakren bad aijingtip hapdeng ki dkhot ka ABT lyngba ka Dark Web lane ka Dark Net. Kine kim shym la pyndonkam ia ka mobile phone ban shu iakren ne ban aijingtip, hynrei ki la pyndonkam lyngba ki apps ki ba kyrpang.
Nalor katei utei u heh pulit u la ong ruh ba kine ki lehnoh ki la pyndonkam ruh da ka VPN ( virtual private network), ka ba dei ka sienjam ka ba suk tam bad ka ba treikam bha na ka bynta ki briew ba kin khanglad halor ki jingtip lyngba ki kor internet bad ban buhrieh ia lade.
Shuh shuh na ka liang u SP u la ong ruh ba ki kynhun seng lehnoh ki la pyndonkam ia ka Dark Net na ka bynta ki kam pynmih pisa bad ban pynpoi ia ka pisa da ka ba pyndonkam lyngba ka virtual currencies nalor kiwei pat ki crypto-currencies.
