Phah jurip man ka por ia ki skul bad ki jaka sumar
Shillong, Jymmang 17 : U Myntri Rangbah ka Jylla Conrad K Sangma, ula bthah ia baroh ki Deputy Commissioner bad ki Sub Divisional Officer (SDO) ba ki dei ban pyrkhat nyngkong eh ia ki paidbah hashuwa ba kin shim ia kano kano ka rai.
U Myntri Rangbah ula bthah ruh ia ki DC bad ki SDO ba ki dei ban leit jurip man ka por ia ki skul, ki hospital, ki CHC, ki PHC bad ban ai kaiphod sha ka Sorkar lyngba ki kor ka juk ba don mynta ba kin lah ban shim rai.
U Conrad ula pynmih ia kine ki jingbthah haba kren ha ka Dorbar Bah jong ki Deputy Commissioner bad ki Sub Divisional Officer ba long hynne ka sngi Thohdieng ha Shillong, ha ka jingiadonlang u Myntri Sorkar bad Kyrmen Shylla.
Kane ka Dorbar ka dei kaba la pynlong ban pyntip ia ki Ophisar halor ki sienjam bapher bapher bala shim da ka Sorkar ban pyntrei sted ia ki kam pynroi kiba pynshong nongrim kat kum ki jingkhein jingdiah ba lum (data).
U Myntri Rangbah ula kyntu ia ki Ophisar ka Jylla ba kin iatreilang lang ha kaban pynthikna ia ka jinglah pyntreikam bha ia ki prokram bad ki skhim ka Sorkar. Ula ban jur ia ka jingkongsan ban buh shuwa hakhmat eh ia ki paidbah ha man ba shim rai, ka ban kyntiew sted ia ka roi ka par jong ka Jylla.
“Ka Dorbar ka long kaba kongsan bha namar ki jingtip (feedback) ba ngi ioh na ki DC bad SDO ki dei kiba kongsan bha na ka bynta u paidbah” ong u Myntri Rangbah.
U Myntri Rangbah ula kren ruh halor ka thong jong ka Jylla ban kynjoh ia ka ‘$10 billion economy’ kaba iasoh bad ki 10 tylli ki kabu bad ki jingkut jingmut ka Sorkar. Ulaong ba baroh ki Ophisar jong ka Sorkar ki dei ban iatreilang kum kawei ban lah kynjoh ia kane ka thong.
Ha kane ka Dorbar, u Commissoner and Secretary Dr Vijay Kumar ula kren bniah halor ki prokram ba pyntreikam lyngba ki technology ba kynthup ia ka rynsan CM-Connect bad ka DC-Connect.
