Nongpoh, Jymmang 16: Ka jingiakvnad hapdeng ki nong Assam bad Meghalaya ha khappud ka Ri-Bhoi District, ka la bteng biang hynne ka sngi Palei ha ka thain Maikhuli, kaba mih na ka jingpakhang lynti jong ki paid Assam ia ka surok.
Ki paid Assam kila pakhang lynti da ki siej ia ka surok ha ka jaka kaba don hakhmat jong ka Assam Border Police Outpost (BoP).
Kat kum ka khubor ba ioh lum, ki nong Assam kila pakhang lynti ia kane ka surok ban khang iaid ia ki trok dumper kiba kit maw bad kit shyiap na ka thain Maikhuli. Kila shim ia kane ka sienjam halor ka jingkynnoh ba ka jingiaid jong ki trok kit mar, kala pynjulor ia ka surok bad buh jingeh ia ki paidbah ka thain.
Kane ka kam ki nong Assam kala pynbitar lep ia ki paid nong Meghalaya kiba sah ha Maikhuli, ha kaba kila iamih paidbah ban ia aireng pyrshah ia kane ka jingpynibor jong ki nong Assam. Ha kane ka jingiamih paidbah, kala don ka jingiatakhuh ban iapyni bor markylliang bad kala mih ruh ka jingiatai nia kaba jur ha katei ka jaka.
Ki nongshongshnong ka Maikhuli kila pyntip ba ka kompani Surekha Enterprise Pvt Ltd, kaba pynkit maw kit shyiap na Maikhuli, ka ju maramot bad pynbha ia kane ka surok na ka por sha ka por bad kala shna ruh ia ki jingker ban iada n aka jingshlei um ne ka jingsniew ka surok ha ka por slap.
Ki Pulit ka Khanapara Police Station haba ioh jingtip ia kane ka jingjia, kila mareh wut wut sha katei ka jaka ha ryngkat ki Pulit ka Pillangkata Ourpost ban tem ia ka jingiakynad.
Haba iohi ia ka jingkhuit ka jingiatim iatla, ki pulit kila pyntip noh sha ki bor pyniaid District ka Kamrup lem bad ka Ri-Bhoi District kiba la wan poi mar mar sha kane ka jaka bad kila lah ban pynjai jai ia ki riew paidbah na baroh arliang, kiba la leit phai noh shala ki jong ki jong ki jaka.
Ki bor District kila ai ka jingkular ba ia kane ka kam (jingsniew ka surok) yn sa shimkhia ban pynbeit da ki Deputy Commisisoner jong ka Kamrup District bad ka Ri-Bhoi District
