Shillong, Jymmang 16: Ka Hynniewtrep Youth Council (HYC) hynne ka sngi kala dawa ban thung daka kynhun tohkit halor ba mih ka kynrum kynram haka por pynlong iaka eksamin CUET ha NEHU.
Haba kren sha ki lad pathai khubor u samla Banpynbiang Riang ula haka 15 tarik Jymmang ba pynlong iaka eksamin CUET ha NEHU kala mih ka kynrum kynram ha kaba ki samla kila hap ban ap jan 3 kynta ban ioh thoh eksamin jong ka English ba dei 3 baje bad ruh ka General test ba long ha la por 5 baje janmiet.
U samla Banpynbiang ula ong ba kane ka jingleh thurmur da ki briew ka National Testing Agency (NTA), kaba pyniaid iaka eksamin CUET, kala ktah bha ia ki samla pule, kiba hap pyndep iaka eksamin haduh 10 baje mynmiet.
“Kadei ban don daka kynhun tohkit halor ka kynrum kynram bad ki bor pyniaid iaka eksamin kidei ban shah pynshitom namar ka jingleh thurmur jong ki kala ktah iaka koit ka khiah ki samla pule kiba la ap naduh mynsngi haduh da miet” la ong u samla Banpynbiang.
U samla Banpynbiang ula ong ruh baka HYC ka dawa naka Sorkar Jylla ban thung da u Nodal Officer hapoh ka Jylla uban iatreilang bad ka NTA ban pyniaid beit iaid ryntih iaki eksamin daka ba pyntreikan da u Help Line Number ban iarap iaki samla pule.
“Ka seng kala ioh jingujor ba ki don ki samla pule kiba khlem ioh thoh iaki Sobjek ba ki mut thoh kumba la kdew haki Admit Card. Ngi dawa naka Sorkar ban iakren bad ka NTA ba kan pynbeit ia kane” ula ong.
Nalor kane ka HYC ka dawa naka Sorkar Jylla ba kan iakren bad ka NTA ban pynthikna ba kum kine ki jingjia kim dei shuh ban jia haki snem ban wan.
 hynne ka sngi kala dawa ban thung daka kynhun tohkit halor ba mih ka kynrum kynram haka por pynlong iaka eksamin CUET ha NEHU){kind=link}