Shillong, Jymmang 16 : Ka Nongbah Shillong kala sakhi ia ka jingshlei um ha kylleng ki jaka, kaba la jia ruh ha ka sien ba nyngkong eh mynta u snem, na ka jingther u slap uba neh tang kumba shikynta-shikynta shiteng hynne ka janmiet sngi Palei.
Ka jingshlei um kaba ishyrkhei eh ka dei ha Lower Lachumiere ha kaba ka um kaba wan tuid na ki nala, kala lang shijaka bad poi shaduh ki phyllaw jong ki Ophis Sorkar kynthup ia ka Sylvan House jong ka Tnad Forest bad kiwei kiwei.
Kumba ju long manla u snem haba jur u slap, ka thain Pynthorumkhrah kala mad ia ka jingshlei um kaba jur bha bad bun ki jaka rep bad ki jaka madan kila dap smam da ka um.
Ka daw jong kane ka jingshlei um ha Pynthorumkhrah ka dei na ka jingbym biang ki nala, kaba la pynlong ia ka um slap ban lang shi jaka.
Ka Wah Umkhrah kaba la stang iar na ka jingrkhiang ka bneng, la iohi ba ka um kala heh bha bad kala kiew wat sha ki Iing briew bad ki surok ki thain Sawforlong, Polo haduh ki thain ka Mawlai Nongpdeng.
La iathuh ba kawei ka Cylinder lah shah rah ha ka um haki thain Pynthorumkhrah.
