Guwahati, Jymmang 16 : U Khlur ialehkai phutbol ka India, u Sunil Chhetri ula pynbna ban shongthait noh na ki jingialehkai phutbol ba mihkhmat ia ka Ri India pyrshah ia kiwei ki Ri (International) hadien ka jingiakhun jong ka FIFA World Cup Qualifier pyrshah ia ka Kuwait la 6 tarik Jylliew.
Une u Captain ka kynhun ialehkai ka India ula pynbna ia kane lyngba ka video ba ula pynsaphriang lyngba ka social media.
U Chhetri bala 39 snem ka rta, ula sdang mihkhmat ia ka Ri India da ka jingiakhun ba nyngkong eh pyrshah ia ka Pakistan ha ka 12 tarik Jylliew, 2005 bad kane ka dei ruh ka jingialehkai kaba ula ioh ban thep ia ka kol ba nyngkong eh ia ka Ri.
Ha kine ki snem, ula thaw ia bun ki record bad mynta u bat ia ka kyrdan kaba lai ha ka pyrthei napdeng ki rang ba dang ialehkai ha ka jingioh thep kol kaba kot haduh 94 kol ha ki 150 tylli ki jingiakhun. Ula bud hadien jong u khlur ialehkai ka Argentina Lionel Messi (106 kol ha ki 180 tylli ki jingiakhun)bad u khlur ialehkai ka Portugal Cristiano Ronalo ( 128 kol ha ki 205 tylli ki jingiakhun).
Ym tang ba dei u nongialam ba bun eh ha ki jingiakhun jong ka kynhun ialehkai ka India hynrei ula ioh ruh ia shibun ki khusnam ha ka rta ialehkai jong u. Ula iohpdiang ia ka khusnam AIFF Player of the Year haduh hynriew sien bad ioh pdiang ruh ia ka khusnam Arjuna Award ha u 2011 bad ka Padma Shri ha u 2019.
