Shillong, Jymmang 15 : Ki samla pule ka Jylla kila iakhun mynta ka sngi Balang ia ka eksam Common University Entrance Test (CUET) hadien arsnem ba kila lait na kane ka eksamin ban ioh rung klas.
Ka National Testing Authority (NTA) kala buh haduh 26 tylli ki Centre ban pynialeh ia ka eksam CUET ha Meghalaya ba kynthup ia 12 tylli ha Nongbah Shillong, 5 tylli ha Jowai bad 9 tylli ha Tura.
Ka Jylla ka don haduh 18,422 ngut ki samla pule kiba la thep kyrteng ban iakhun ia ka CUET. Haduh 8535 ngut ki samla la khmih lynti ba kin iakhun haki Centre ha Shillong, 4269 ngut ha Jowai bad 5618 ngut ha Tura.
Ka NTA kan sa pynbna ia ka result jong ka CUET 2024 bad CUET score card ha ka 30 tarik Jylliew.
Ia kane ka eksam CUET la pynlong bad Online bad Offline mode-Computer Based Test (CBT) bad ka jingthoh da khulom bad ka kot. Ia kane ka eksam yn pynlong ha ka 21 tarik, 22 bad 24 tarik Jymmang. Ha kajuh ka por, ia ka eksam offline la pynlong ha ka 15 bad 18 tarik Jymmang.
Ha kine ki arsnem bala leit, ka NTA ka khlem pynlong satia ia kane ka eksam ha Jylla hadien ka jingud jingnam na ki samla pule bad ki kynhun bapher bapher kaba pynbor ia ka Sorkar Jylla lyngba u Myntri Rangbah ka Jylla ba un thoh sha ka NTA bad sha ka Sorkar Pdeng ba kan pynlong ia ki samla pule ka Jylla na ka jinghap iakhun ia ka CUET.
Ha u 2022, u Myntri Rangbah ka Jylla Conrad K Sangma ula ong ba ka Jylla kaba don 12 tylli ki District bad ka jaka bala ithuh ban pynlong ia ka eksam CUET ka dei tang ha Shillong, kan buh ha ka jingeh ia ki samla pule ka Jylla kiba don haduh 25000 tam kiban iakhun ia ka eksam.
Ha u 2023, u Conrad ula kyrpad biang ia ka Sorkar Pdeng ban pyllait ia ka Jylla n aka CUET da kaba ong ba ka eksam jong ka MBoSE kala long slem namar ka jingdon ka elekshon MLA bad kumta kan buh ha ka jingeh kaba khraw ia ki samla pule ba kin iakhun ia ka eksam CUET.
Namar kane ka jingkyrpad u Myntri Rangbah ka Jylla, ka Sorkar India kala rai ban pyllait ia ka Jylla Meghalaya bad ia kiwei ki Jylla ka thain Shatei Lam Mihngi na ka jingiakhun ia ka CUET.
 hadien arsnem ba kila lait na kane ka eksamin ban ioh rung klas.){kind=link}