Guwahati, Jymmang 04: U National General Secretary ka NSUI, Assam Unit, Kabir Ahmad ha ka sngi Thohdieng, ula dawa ban pyllait noh khlem teh kyndon ia u Nongtrei ka Congress ba shah kem, u Reetam Singh.
Ki Pulit ka Assam kila kem ia u Reetam Singh ha ka 29 tarik Iaiong halor ka jingkynnoh ba u pynphriang ia ka video thok jong u Amit Shah, kaba la saphriang pathar.
Haba iakren bad ki lad pathai khubor ha Rajiv Bhavan, Guwahati, u Kabir ula ong ba kane ka jingkem ka dei ka bym iahap namar ka video jong u Amit Shah ka dei kaba la don ha Internet la palat artaiew. “Kam don shuh ka riti synshar paidbah hapoh ka Ri mynta, ki briew kila shu shah kem khlem kano kano ka daw. Lada ym pyllait khlem teh kyndon ia u Reetam Singh, ka NSUI kan long ia ka jingiakhih ha baroh kawei ka Jylla Assam” ong u Kabir.
“Ka Video (u Amit Shah) kala don ha Social Media da ki taiew hashuwa ba un shah kem. U lei ula shut hep lang ia katei ka video. Ka jingshisha kan sa paw hadien ka jingtohkit.
Hynrei kito kiba la iai thep bunsien ia kane ka video kim shym la shah kem satia, balei tang ia u Reetam Singh” buh jingkylli u Kabir.
U Reetam Singh u dei u War Room Coordination jong ka party Congress ha Assam.
Ka Congress ka Assam kala pynjngai ialade na kane ka kynrum kynram bad ong ba ka jingthep u Reetam Singh ia ka Video ka dei ka kam shimet jong u bad kam don jingiadei satia bad ka party congress. Hynrei, ka party ka pynrem ia kane ka jingkem bad pynrem jur ia ka policy jong ka Sorkar kaba ktah ia ka riti synshar paidbah.
U Myntri kam pohiing Amit Shah ula thep ia ka original video bad ka video thok ha ka X bad ong “Ka Congress mynta kala shim ia ka lynti ban ialam bakla ia ki paidbah da ka video thok namar ka jingsheptieng ia ka jingshah rem. Ka hok ban ai bhah hapoh ka Ri ka dei ia ki ST, SC, bad OBC bad katba ka Sorkar BJP ka dang don ha ka bor, yn ym don ba lah ban pynkylla ia ka”.
