Nongstoiñ, Jymmang 2: Ka Hynñiewtrep Youth Council-Mawshynrut circle kala kam ba ka seng lem bad u SDO ka tnad PWD-Mawshynrut Division, kila lap dala ki jong ki khmat ia ka jingtrei torti ki contractor ia ka surok ba 12 Km na Mawsyrpad sha Thaiem.
Kane ka jingkam kala mih hadien ka jingleit jurip jong ka Seng bala ialam da u President Losbingbel Lyngkhoi lem bad u SDO ia kane ka surok hynne ka sngi Palei.
La kam ba u SDO ila lap dala ki jong ki khmat ba don ki katto katne tylli ki jaka kiba ki contactor kila trei torti ia ka kam bad ki khlem trei kat kum ka Detailed Project Report.
La ban kdew hangne ba ia kane ka surok ba 12 Km na Mawsyrpad sha Thaiem la pyntrei da ki 32 ngut ki contractor. Don ki contractor kiba siang da ka rong bym pat test da ka office bad na ka liang u SDO u lah phah sangeh ban trei, namar la shem ba kila pyndonkam da ka rong Prominent Sales Corporation (Prominent Bitu-Bind) haduh ba ka department kan ïoh ban test shwa ïa katei ka rong.
Ka HYC ka ong ba don ki kam kiba u SDO u lah phah trei biang sa shisienia ki contractor bad la lap ruh ba ki don ki contractor ki bym pat siang wat tang u maw haduh mynta watla ka por kala jan kut 18 bnai.
Ka HYC ka pyntip ba u SDO u la kular ba un sah shimkhia ban leh eiei halor kane ka jingshem bad un sah leh ïa kaba donkam pyrshah ia ki contractor
Ha kajuh ka por, ka HYC kala ai khublei ïa u EE PWD Mawshynrut Division bad ïa u SDO kiba la sngap ïa ka jingujor ka seng bad shimkhia ïa kane ka kam.
