Shillong, Jymmang 01: Ka Sorkar Jylla kala bthah iaka Shillong Municipal Board (SMB) bad iaka tnat pynroi sor ban peit bha biang bad ban wan bad ka jingpynshai haba iadei bad ka jubab RTI kaba kdew ba 148 tylli ki longing naki 342 tylli hapoh Them Iew Mawlong kidei kiba sah beain.
Ka jubab RTI ka dei kaba la ioh naka SMB daka Hynniewtrep Youth Council (HYC), kaba la dawa ban tuklar mardor da u Symbud Myntri Rangbah ka Jylla Bah Prestone Tynsong.
Ka HYC kala kynnoh baka jubab RTI ka kdew shai ba ki don tang 194 tylli ki longing kiba dei jong ki nongtrei ka SMB bad kiwei ki tnat Sorkar kiba sah ha Them Iew Mawlong, ym haduh 342 tylli ki longing kiba la kdew ka Affidavit bala aiti shaka Meghalaya High Court kaba bishar ia ka mukotduma ban pynkynriah ia kine ki longiing na Them Iew Mawlong.
Haba kren sha ki lad pathai khubor u Bah Prestone ula ong “Ka dei shisha ka HYC kala aiti daka dorkhas halor ka jubab ba ki ioh lyngba ka RTI kaba kdew ba haka jaka 342 tylli ki longing, ki lap ba tang kumba 194 ki dei ki longiing jong ki nongtrei ka SMB bad kiwei ki tnad, nga la ong iaki ba ia kane hap ban pynshisha. Nga la phah iaka jingthoh sha u CEO ka SMB bad Director ka tnat Urban Affairs ba kin pynshisha bad hadien kata kin pyntip biang sha nga”.
Haba kdew ba ka jubab RTI ka dei kaba la ai daka SMB, u Bah Prestone ula ong “Ka rukom jubab ia ka RTI nga kynmaw haka por ba nga bat kum u Myntri ka tnat Bording, haka skhim Saubhagya bad ka RTI ka jingdon jingkhein kiba don ha ki file ki iapher, kumta ngam lah ban kam ba ka dei kaba shisha namar kata nga la phah biang sha ki tnat ba kin wanrah lut ia baroh ki jingtip bad lada donkam ba kin ai jingpynshai”.
Nalor kane u Bah Prestone ula pyntip baka Sorkar kan iaid shakhmat ban lum ka jingialang bad ka Harijan Panchayat Committee (HPC) haka 7 tarik mynta u bnai ban shim rai halor ka jingthmu ban kynriah iaki ba sah ha Them Iew Mawlong.
, kaba la dawa ban tuklar mardor da u Symbud Myntri Rangbah ka Jylla Bah Prestone Tynsong.){kind=link}