Shillong, Iaiong 26 : U Nongialam jong kawei ka kynhun ki runar ba kiengatiar, uba la shah kem ha ki Pulit, ula dkhat jubor iala ka jong ka jingim ha u tyllai phasi hapoh ka along jong ka Khanapara Police Station hynne ka sngi Sngi Thohdieng.
Une u briew u kyrteng u Rudra Rabha uba la shah kem halor ka case Arms Act myn ha ka 24 tarik Iaiong bad la ialam tian bishar ia u sha Iingkashari hynnin ka 25 tarik Iaiong ha kaba ka Iingkashari kala phah set ia u san sngi ha ka Police Custody.
“Ha ka por ba tohkit ia une u runar halor ka case ba u donkti, ula kubur b aula buhrieh ia kwei ka tiar siat ba shna hi sha khlaw bad ula pynpaw ia ka jinglong ba kloi ban ialam lynti ia ki Pulit ba kin leit kurup ia kane ka tiar siat. Kumta hi, da ka jingialam lynti jong u, ki Pulit kila ioh kurup ia kane ka tiar sait na khlaw Ranibari ha ka jingiadonlang ki sakhi shimet” ong u Superintendent of Police ka Ri-Bhoi Jagpal Singh Dhanoa ha ka kyrwoh.
U pyntop ba hadien nala pyndep lut ia baroh ki jingdonkam kat kum ka ain ha kane ka khlaw, ia kane ka tiar la kurup noh bad la wanrah sha Khanapara Police Station ha ka por 1.05 mynstep jong ka 26 tarik Iaiong bad la buh ia ka hapoh ka Police Station namar ka jingbymdon ka along ha Rani Jirang BOP.
“Hynrei, mynta ka sngi (26 Iaiong) ha ka por 4 baje mynstep, u Pulit ba don duty ula lap ba u Rudra Rabha ula dkhat jubor iala ka jingim ha along jong ka Police Station da kaba sdien phasi na ki nar jingker jong ka along bad ula pyndonkam ia ka jain kaba ula tar na ka blanket bala ai ba un kup thiah” ong u SP.
“Halor kane ka jingjia, ka Ophis u Deputy Commissioner kala phah ia u Executive Magistrate ban pynlong ia ka post mortem ha ka jingiadonlang u Medical Officer ha ryngkat ka jingring video/shondur ha ka jaka ba leh” ula iathuh haba pyntip ba ka jingtohkit mynta kala iaid shakhmat.
