Jingshit kyr-ang| Khang ka Sorkar ia ki Skul ban pynlong tamasa ne ialehkai sha madan madiah

Shillong, Iaiong 26 : Namar ka jingshit kyr-ang palat jong ka suinbneng kaba la ktah ia baroh kawei ka Jylla, ka Sorkar Meghalaya hynne ka sngi Thohdieng, kala pynmih ia ka notification ba bthah ia baroh ki skul ba kin bud ryntih ia ki jingbthah ha kaban pynthikna ia ka jingshngain bad ka bha ka miat jong ki Khynnah skul bad ki Nonghikai.

Ha ka hukum bala soi da u Director of School Education & Literacy, Swapnil Tembe, la bthah ia baroh ki skul ba kim dei ban pynlong ia kino kino ki tamasa ne ki lympung ialehkai sha ki jaka madan hapdeng kane ka jingshit kyr-ang ka sngi bad ruh ha kino kino ki sngi ki ban wan lada shit kyr-ang ka bneng.

Kala bthah ruh ia ki skul ba kin pynbiang ia ki umdih ha baroh kawei ka phyllaw iingskul, kynthup ia ki jaka rieh sngi.

Lada jia ba don ka jingkhie shitom na ka jing tyrkhong um ka met (dehydration), ia ki Khynnah dei ban pynkit beit mar mar sha ki jaka sumar ba marjan, ong ka hukum.

Ka jingshit bala thew ha Shillong hynne ka sngi Thohdieng ha ka por 12 baje mynsngi ka lot 28 degree Celsius, ha Nongpoh ka kot 33 degree Celsius bad ha Tura, ka jingshit kala kot 33 degree Celsius.

Namar kata, ka Sorkar Meghalaya kala ai jingmut ruh ba baroh ki khynnah skul ki dei ban dih um bha bad ban rah iala ka jong ka umdih sha skul. Ka hukum ka bthah ruh ia ki skul ha Jylla ba kin pynbiang ia ki ORS/umsohjew lada don ki Khynnah kiba kem pang na ka jingtyrkhong um ka met.

Ka Sorkar kala ai jingmut ruh ba hapdeng ka por 12 baje haduh 3 baje janmiet, ki skul ki dei ban kiar ha kaban shah ia ki khynnah ba kin shah sngi, hynrei lada donkam, dei ban phah tap tupia lane shatri ia ki khynnah haba ki wan bad mih na skul.

Ka hukum kala khang ruh ia ki khynnah skul ba kin iaid da ka kjat suda hapoh lane sha ki jaka ba marjan jong ka skul.

Ka Sorkar kala kyntu ruh ia ki bor khmih, ki emergency service bad ki nongtrei ka koit ka khiah ba kin ai ka jingiatreilang bad ki skul. La ai jingmut ruh ba ki skul kin iakren bad ki jaka sumar ba marjan bad ban buh lypa ia ki phone nombor ioh donkam ha kano kano ka por.