Shillong, Iaiong 23: Lai ngut ki samla Khasi la kynnoh ba kila shah shoh dusmon ha ki shipai Border Security Force myn ha ka miet 20 tarik Iaiong ha Jingkieng Sonapyri, ka lad ka ban leit sha shong Huroi.
La kynnoh ba kine ki shipai BSF kiba la shoh khaw-iang, kila bat ia kine ki samla khasi kiba poi iaid lynti na kane ka jingkieng da artylli ki kali ha ka nam ban talasi hynrei la kynnoh ba ki shipai kila shu ktah kti bad bom da ki lathi ia baroh lai ngut haduh ba uwei ula mynsaw jur.
Nalor kane, la kynnoh ba ki shipai BSF kila bom ruh ia kine ki artylli ki kali bad kila pynpait ia ki Iit jong kine ki kali.
Ka Khasi Students Union-East Jaintia Hills bad Narpuh Circle, kila pynrem jur ia kane ka jingjia bad ong ba kane kam dei satia ka jingjia ba shu jia ryngkhat hynrei kane ka kam pynibor ki BSF ka dei kaba ju jia na ka por sha ka por.
Ka KSU kala phah ia ka jingujor sha ki bor District halor kane ka jingjia bad buh ruh ia ka jingdawa ba dei ban pynkynriah noh mardor ia ki BSF na kane ka jingkieng bad kumjuh ruh na Ratacherra.
Ka KSU kala pyntip ruh ba kan sa shong jingialang kyrkieh mynta ka sngi ban iakren halor kine ki jingjia bad ki sienjam ban shim halor ka jingiai pyni bor ki shipai BSF.
