Shillong, Iaiong 17 : U President ka NPP Meghalaya Bah Prestone Tynsong ula ong ba ka Jylla Meghalaya ka donkam eh ia I Kong Ampareen ban leit mihkhmat ia ka Shillong Parliamentary seat sha Iingdorbar Parliament bad ka dei ruh ka kyrtong kaba biang eh kaba lah ban long ka jingkieng ban pyniajan ia ka Sorkar Jylla bad ka Sorkar Pdeng.
U Bah Prestone ula ong “Ngi donkam eh ia I Dr Ampareen namar na baroh ki 60 ngut ki MLA ka Jylla, ka dei kaba tbit tam, kaba la ioh jinghikai bad la kha ia ka na ka iing jong u riewshlur ka jaidbynriew jong ngi u (L) Bah PeterMarbaniang, ka para trai jong u Bah RG Lyngdoh ia kaba ngin ym klet shuh lano lano kum ka jaidbynriew”.
Haba kren ha ka rynsan ialap elekshon ha Malki hynne ka sngi Balang, une u Nongialam ka NPP ula ong “Kiwei ki party kiba lynthem maw ia I Dr Ampareen hynrei katba phi dang lynthem maw kata I nang rakhie sahuh pynban, I bhabriew bad I shad I kmen. Phin ioh naei ka liongkmie ka bym ju thiah na kawei ka jaka sha kawei ka jaka ba kyndong tam I poi lut… ko ki riew ieid jaidbynriew phin leit tang ha Ranikor ruh phin ym tip ki don katno tylli ki shnong”
Ula kyntu ia ki paidbah ka Shillong Parliamentary Constituency ba ka seng NPP kan ai ka jingshakri kaba bha tam bad kan shakri hok ia ki paidbah ka jylla.
U Bah Prestone ula pynkynmaw ia ka jingtrei khlem shongthait bad miet bad sngi jong ka Sorkar ba ialam da ka NPP ha ka por ba wan lynshop ka khlam Covid-19 ha Jylla.
“Ngi la shimkhia ban wan ialam shala iing haduh 78000 ngut ki nong Meghalaya kiba don shabar ka Jylla. Ngi la pynlut haduh 1000 klur ka tyngka ban pynpoi biang ia ki samla, ki longkmie longkmie, sam marbam mardih bad kiwei kiwei” ula ong.
Hynrei ula ong ba hadien ba ka khlam kala jai jai, kila mih pynban ki nongpynsngewthuh bakla, mih ki seng sain pyrthei kiba kynnoh lai phew jait ia ka Sorkar ba ialam da ka NPP.
“Ki jingkynnoh kiba laiphew jait kila mih pyrshah ia ka sorkar ba ialam ka NPP, hana ki ong ba shiteng na kata kaba pynlut ia ka 1000 klur kala rung lut ha ka pla jong u Prestone, Sniawbha bad sha pla jong u Conrad Sangma. Khein ma phi ki longkmie longkpa ngi iakhun ia ka iap ka im, hynrei dang don pat ki briew kiba dang nud ban lynthem maw bad kdew kti ia ngi ki bym ju iohthiah ha kato ka por” ong u Bah Prestone.
“Ka nongrim jong ka NPP ka long ban shakri hok bad ka nongrim ka jong ngi ka long ha utei u nongbuh nongthaw. Ym don uwei ruh uba hok ong ka ktien bad kynmaw bha ia kata bad ngi la ieng ha kane ka lympung bad u Blei ula jubab ia ngi ha u 2023 kata na ka 19 seat mynta ngi lah don 28. Hato kata kam dei mo ka mon u Blei, kadei ka mon jong u Blei.
Ko ki party kiba ieid kiba na kiwei kiwei kiba lynthem maw ia ka NPP kam lei lei, U Blei yn map ia phi, tangba lada phi donkam ngi don ha syndah jong phi ia ki jingdonkam ki jong phi kiba man la ka sngi” ong u Bah Prestone.
