Shillong, Iaiong 13: Ka Rangdajied United FC kala ioh bat ia ka kyrdan kaba nyngkong ha ka Shillong Premier League 2023 da kaba pynrem da 2-1 ia ka Shillong Lajong FC ha ka jingiakhun kaba la long ha SSA Stadium, First Ground, Polo, hynne ka sngi Saitjaiñ.
Ka jingiakhun hapdeng kine ki ar tylli ki kynhun kala long kaba itynnad khamtam haba kila ia jop mar 3 sien hynrei ka Rangdajied kala tam noh da 3 point ia ka Lajong da ka jinglah ban jop hynne ka sngi.
Mar ia sdang ka jngiakhun ka Lajong ha ka minit kaba 7 kala ioh ia ka Penalty hynrei haba u Kapten ka Lajong u Gladdy Kharbuli ula leit ban shut um shym la lah ban thep da ka jingtbit u nongapkol ka Rangdajied u Banshanskhem Kharsyntiew uba la ioh ban iada ia ka bol ban rung shapoh kol.
Hynrei ha ka minit kaba 18 ka Rangdajied kala ioh ia ka Penalty bad u kapten ka Rangdajied u Arlangky Nongsiej khlem da pynlehnoh ei ula thep ia ka kol.
Ha ka minit kaba 25 u Deibormame Tongper ula thep ia ka kol na ka bynta ka Lajong bad haduh ba kut ka kylla step ka jingiakhun kala ia khaid da 1-1.
Ka jingiakhun ha ka kylla miet kala long biang kaba itynnad hynrei ha ka minit kaba 79 u Ksankupar Khongmalai ula ioh thep ia ka kol lyngba ka Freekick na ka bynta ka Rangdajied bad kane ka kol kala pynthikna syndon iaka Rangdajied ban jop ia kane ka jingialehkai.
Ka Rangdajied mynta kala don haka kyrdan kaba nyngkong da kaba kamai 12 point bad kala tam da 2 point ia ka Mawlai SC kaba wan baar, katba ka Lajong kala hiar sha ka kyrdan kaba 3 da kaba kamai 9 point.
