Shillong, Iaiong 12 : U Symbud Myntri Rangbah ka Jylla ba khmih ia ka kam pohiing (Bah Prestone Tynsong, ula bthah ia u Director General of Police (DGP) ban pynthikna ia ka jingshong suk shong shngain ha kane ka por ialap elekshon jong ki seng sain pyrthei na ka bynta ka elekshon Lok Sabha, ka ban long la 19 tarik Iaiong.
“Ngi la bthah ia u DGP bad ruh ia baroh ki SP bad DC jong ki District ba ki dei ban trei kham bha namar ka jingiaid ki jing ialang ialap elekshon jong ka elekshon Lok Sabha ka ban long la 19 tarik Iaiong, khnang ban pynneh ia ka shongsuk shongshngain” ula ong haba iakren bad ki nongthoh khubor.
U Bah Prestone ula ong ba kane ka jingbthah kala mih hadien ki jingjia ba dang shen, namar ki brew kila pyrshang ban pynthut ia ki jingialang ialap elekshon jong kiwei pat ki seng sain pyrthei, kiba iakhun ia kane ka elekshon Lok Sabha.
“Kumta, ngi la ai ka jingbthah kaba tyngeh ia u DGP bad baroh ki bor District ba kin shimkhia ia kane bad ban peitngor ia ki jinglong jingman jong kawei pa kawei ka jingialang ialap elekshon. Kane ka dei kaba ngi la pynthikna ban pynthikna ia ka elekshon kaba suk bas ain” ong u Bah Prestone.
“Nga kyrmen ba ki jingialap elekshon kin iaid beit noh nangne shakhmat khlem kino kino ki jingpynthut” ula bynrap.
