Shillong Iaiong 10: Ka Langsning FC hynne ka sngi kala pynrem ia ka Sawmer SC da 1-0 ha ka jingiakhun ha ka Shillong Premier League 2023, ha SSA Stadium First Ground, Polo.
Kane ka jingiakhun kala long kaba itynnad naduh kaba sdang jong ka kylla step ha kaba baroh ar tylli ki kynhun kila ioh ia ki kabu hynrei kim shym la lah ban thep kol bad kane ka jingiakhun ha ka kylla step kala kut haka jingiakhaid.
Wat ha ka kylla miet ruh, ka jingiakhun kala long kaba iakhaid na ka jingialehkai bha jong ki rang ialehkai ka Langsning bad ka Sawmer hynrei haba ka Langsning kala pynmih ia u Damanbhalang Chyne bad hashwa ban kut noh ka jingiakhun u Damanbhalang ula thep ia ka kol ha ka minit kaba 86 bad kane kala pynthikna syndon ia ka Langsning ban jop ia ka jingiakhun.
Ki rangialehkai jong kine ki ar tylli ki kynhun kila ioh ia bun tylli ki kabu ha ka kylla miet hynrei kim shym la lah ban thaw pyrthei eiei.
Kane ka jingjop kala pynlong ia ka Langsning ban kamai 6 point bad ban don ha ka kyrdan kaba 4 katba ka Sawmer kala don sha trai duh namar kam pat lah ban kamai point eiei.
Ha ka sngi Palei ka jingiakhun kan long hapdeng ka Ryntih SC pyrshah iaka Nangkiew Irat SC ha ka por 3 baje mynsngi.
