Shillong, Iaiong 10 : U National General Secretary ka National People’s Party (NPP) bad Symbud Myntri Rangbah ka Jylla Bah Sniawbhalang Dhar ha ka sngi Balang, ula kyntu ia ki paidbah ka Nartiang constituency ba kin kyntait ia ki kynhun Liang Pyrshah Voice of the People Party (VPP) bad ka Congress ha kane ka elekshon Lok Sabha ban long la 19 tarik Iaiong.
Haba kren na ka rynsan ialap elekshon ba long ha Namdong, u bah Sniawbha ula ong ba kam don jingmut satia ban vote ia ka VPP namar ka dei ka party kaba kut tang ha Byrnihat.
“Ym tang katta, ka VPP kam don ruh ia ka bor ban tynrong ha tyrpeng ia ka jingkitkhlieh” ula ong haba bynrap ba ha ka Congress ha kawei ka liang kala long kum ka “Kali ba iaid khlem ki shaka”.
U Bah Sniawbha ula ong “Ka (Congress) long kum ka permit duplicate, kaba la shah kyntait kat shaba don ki jaka” ula ong.
Kat kum ka jingong jong u, watla u MP ka Congress Bah Vincent H Pala u dei u briew uba bha, hynrei u khlem pat leh eiei satia na ka bynta ka Nartiang constituency bad ia ki paid nongshongshnong.
Haba pynpaw ba dei tang ka NPP kaba don ia ka permit kaba treikam, une u Symbud Myntri Rangbah ula ong “Kumta, nga kyrpad ia baroh 24,000 ngut ki nongthep vote (jong ka constituency) ba kin kyrshan bad ai vote sah ka kyrtong ka NPP na Shillong Parliamentary seat ha ka 19 tarik Iaiong”.
Haba ai jingkren, u Nongialam barim ka Congress Bah Nehimaya Tyngkan, uba dang shu iasoh shen sha ka NPP, u ruh ula kyrpad ia baroh ki nongkyrshan ka Congress ba kin kyrshan noh ia ka NPP ha kane ka elekshon ban wan.
“La NPP kala synniang shi kat dei eh sha ka roi ka par jong ka Jylla watla ka dang don tang 6 snem ha ka bor synshar” ula ong.
U Bah Nehimaya ula thalain ruh ia u President ka VPP Bah Ardent M Basaiawmoit namar ka jingialehkai ia ka sain hima sima ba jakhlia.
“Nga ju leit lang bad u Bah Ardent ha ka por ba u leit ialap ‘Clean Politics” mynshuwa hynrei mynta ula donbynta pynban ha ka “dirty politic” (kam sain pyrthei ba jakhlia)” ula ong haba bynrao “Ka jingshisha ka long ba u Bah Ardent bad ka party jong u kan nym lah da lei lei ruh ban ialam ia ka Jylla. Lada ki lah, nga long uba kloi ban pynkylla noh ia ka kyrteng lajong”.
