Shillong, Iaiong 10 : Ka Bharatiya Janata Party (BJP)-East Jaintia Hills ha ka sngi Balang, kala rai ban ai ka jingkyrshan ba pura ia ka kyrtong ka NPP kong Ampareen Lyngdoh ha kane ka elekshon Lok Sabha ban long la 19 tarik Iaiong.
Ia kane ka rai la shim ha ka jingialang jong ka party ba long ha Community Hall, Khliehriat West, East Jaintia Hills hapoh ka jingialam jong u District President Bah Commanderful Sana.
U Bah Sana u pyntip ba ia kane ka rai la shim halor ka jingbthah jong u Myntri Rangbah Duh, Narendra Modi bad ba ka dei ruh na ka bynta ka bha ka miat jong ka District, ka Jylla bad ka Ri.
Ha kane ka jingialang, la pdiang sngewbha ruh ia ki dkhot ba thymmai jong ka party da u National Council Member Bah David Kharsati bad u President barim ka BJP-Meghalaya Bah Shibun Lyngdoh.
