Shillong, Iaiong 04: Ka sorkar jylla kala khang ia ka Khasi Students Union ban pynlong iaka jingrakhe Khasi National Awakening Day ne ka Sngi Kyrsiew Ri da kaba kyntait ban ai jingbit ia kane ka seng ki samla pule ba kan pynlong ia ka prokram hapoh rilum Khasi Jaintia.
Manla u snem, ka KSU ka ju rakhe ia ka 4 tarik kum ka sngi kyrsiew thiah ia ka Jaidbynriew Khasi ba kan ieng iakhun ia ka jinglaitluid, ka jingshong shngain, ka jingshongsuk hapdeng ki Khun ki hajar ka Bri u Hynniewtrep bad khamtam eh, ban don ia ka mynsiem ka jingsngew long trai iaka Ri kaba ki Longshuwa bad ki Nongiakhun laitluid kum u Tirot Sing kila iakhun lyngba ka thma pyrshah ia ka Ri Bilat ha u snem 1829.
Ka KSU ha ka jingshisha kala pynbeit ban pynlong ia ka jingrakhe kaba heh ha Khliehriat,East Jaintia Hills hynrei namar ka jingbym ai jingbit jong ki bor Sorkar, ka KSU kala rai ban pynsangeh ia kane ka jingrakhe.
La ong ba ki bor Sorkar kila kyntait ban ai jingbit halor ka nongrim bala treikam ka Model Code of Conduct jong ka Elekshon Lok Sabha bad namar ka jingbym sngew shngain na ka jingmih ki huri hura ha kine ki khyndiat sngi bala leit.
Haba pyntip ia kane, u General Secretary ka KSU samla Donald V Thabah ula ong “Ka Seng kala dep pynbeit ia ka prokram kaba heh ha Khliehriat..ngi la pan jingbit ruh na ki bor District kila kyntait ban ai jingbit da kaba ai dawa ba la treikam ka Model Code of Conduct bad ka jingdon ka huri hura ha ki sngi bala leit”.
Kat kum ka jingong jong u, “Nyngkong u DC ka EJH ula pynpaw ia ka jingbym don jingeh ban ai jingbit lada ka Seng kala ioh jingbit na u Chief Electoral Officer (CEO). Ngi la leit iakren bad u CEO hynrei une ruh ula pynpaw ba kam don jingeh lada mynjur u DC…hynrei hadien la pyntip sha ngi ba la kyntait ban ai jingbit namar ka elekshon Lok Sabha”.
Une u Nongialam ka KSU ula ong “Lada ka KSU ka mon ban pynlong ia ka prokram ban rakhe ia kane ka Sngi Kyrsiew Ri ha man la ki shnong ki thaw ruh ka lah, lada ngi kwah ban pynlong ha East Jaintia Hills mynta mynta ruh, ngi lah ban leh ia kata, hynrei namar ba kala don ka jingiakren kumta ngi ruh ngi la pdiang”.
“Hynrei la shem snem, ka Seng kan pynkhreh ia ka jingrakhe kaba kham heh shuh shuh bad kam dei ban don kano kano ka jingkhang” ong u General Secretary ka KSU.
