Shillong, Iaiong 04 : Ka Khasi Students’ Union (KSU) kala kynthoh jur ia ka jingmih ki Politician ha Jylla kiba ‘thiang tang ka ktien’ ba ‘ieid jaidbynriew’ tang ha ka por elekshon hynrei ki bym leh eiei pat na ka bynta ka Jaidbynriew.
Kane ka jingkynthoh kala mih na u General Secretary ka KSU samla Donald V Thabah haba kylli halor ka jingsawa ki sur ‘Ieid Jaidbynriew’ na ki rynsan ialap elekshon ha Jylla ba kynthup ia kane ka elekshon Lok Sabha, ka ban long ha ka 19 tarik u Iaiong.
Kane ka jingkynthoh ka dei ruh kaba kongsan kaba ki paidbah kin hap ban thew pyrla bha ha kane ka elekshon Lok Sabha namar ka jingmih ki seng sain pyrthei kiba pynbiej ia u paidbah da ki nongrim ba tang ma ki, kiba ‘Ieid Jaidbynriew’.
Haba kylli, u samla Donald ula ong “Kane kam long shuh kaba thymmai (jingkren ieid Jaidbynriew ki Politician) haba buh jingkylli, katno ngut ka Jylla kala sei ia ki Statesman la katta ki snem”.
Une u Nongialam ka KSU ula ainam ia ki katto katne ngut ki Nongialam kiba trei shitom ia ka kam na ka bynta ka Jaidbynriew kum u Bah Martin N Majaw uba la wanrah ia ka Ain bat khyndew bad katto katne ngut.
“Ki Politician ba mynta ki thiang tang ka ktien lada ki kren ha ki jingialang paidbah, ki kren ieid jaidbynriew la kum ba dei tang ma ki, kiba ieid jaidbynriew pynban ynda kila jop bad shong ha ka shuki, kaei kaba kila leh” ula ong.
“Ngim pat iohi haduh mynta aiu ba kila leh, kaei ka jingshakri ba kila ai ban pyni ba ka Jaidbynriew jong ngi kala shong shngain, khamtam ban weng ia ki mynder ri kiba wan buhai shnong ha ka Jylla” ula bynrap.
