Shillong, Iaiong 03: Ka Meghalaya ka don 187 tylli ki Polling Stations haki thain khappud ka Jylla Assam bad 140 tylli ki Polling Station haki jaka khappud bad ka Ri Bangladesh.
“Na kane, ki don 164 tylli ki Polling Staton kaba ki kynhun pyniaid elekshon ki hap ban iaid lyngba ka Assam” iathuh u Chief Electoral Officer (CEO) ka Jylla Dr BDR Tiwari haba iakren bad ki nongthoh khubor.
U iathuh ba ka jingialang kala don haka kyrdan Chief Secretary hapdeng ka Meghalaya bad Assam ba iakren ia kane ka kam khamtam eh ban pynthikna ba ki nong shong shnong khappud kin ioh iaid laitluid ban leit thep Vote haka 19 tarik Iaiong.
U pyntip ruh ba ia kine ki kam ba iadei bad ki jaka khappud ka Assam, la dep ruh ban iakren ha ka jingialang bala pynlong da ka Election Commission of India bad ki Chief Secretary, DGP hynne ka sngi.
U CEO ula ong “Ngi la leh iaka ba donkam kum ka jingiaid pahara haki thain khappud lyngba ka jingiatreilang bad ka Sorkar Assam ban pynthikna ba ki paidbah kin ioh thep Vote daka jingshngain bad daka jinglait luid”.
U CEO ula pyntip ruh ba ki kynhun jong ka Sorkar Pdeng bad Sorkar Jylla ki leh iaka ba donkam bad ka tnat Election ruh kala pynkhlain iaki Flying Squad, SSTs, VSTs kumjuh ruh ban pynbiang ki jaka leh talasi ban pynthikna baka sngi thep Vote kan long kaba iaid beit iaid ryntih.
Haba kylli halor ka jinglong jingman hapoh Meghalaya, u CEO ula pynksan daka ba ong “Kam don kano kano ka jingktah iaka suk ka sain hapoh ka Jylla khamtam kiba lah ban ktah iaka ilekshon. Ia kine baroh la khmih bniah daki bor sorkar katkum ka jingbthah ka ECI”.
