Shillong, Iaiong 03 : U Superintendent of Police ka East Khasi Hills Rituraj Ravi, ula pynshai ba ka jingkem ia ki arngut ki dkhot ka Khasi Students Union (KSU) halor ka jingshah pyniap ki nongbylla bar jylla ha Ichamati, ka dei kaba la leh halor ki jingiohi ksai bad ki sakhi sabut kiba khlain bha.
“ Naduh ka sngi ba jia ka jingshah pyniap, ngi la sdang ia ka jingtohkit, ngi la iakren ia ki nongsakhi ia ka jingjia bad ngi la ioh ban lum ia ki sakhi satar bad ki scientific data nalor ka jingtip ia kaei kaba jia ha kane ka sngi” ong une u Heh Pulit.
Ula ong “Ha ka jingtohkit ngi la iohksai lut bad halor ki sakhi satar kiba khlain, ngi la kem ia kine ki arngut”.
Lah ban kdew hangne, arngut ki dkhot ka KSU-South Khasi Hills kila shah kem ha ka miet sngi Nyngkong ha ki Pulit halor ka jingkynnoh ba ki donkti ha ka jingpyniap ia kine ki nongbylla bar Jylla, hadien ba wai ka rally pyrshah CAA.
Hynne ka sngi Balang, ki Dkhot ka KSU ha ryngkat ki riew paidbah na kylleng ki shnong ka Sohra Sub Division, kila leit tur paidbah sha Sohra Police Station ban pan jingpynshai halor ka jingshah kem kine ki dkhot ka KSU.
Halor kane ka jingiakhih ha Sohra, u Rituraj Ravi ula pyntip ba ki don kumba 300 ngut ki dkhot ka KSU bad ki paidbah kiba iashimbynta ha kane ka jingialum paidbah hakhmat ka Sohra Police Station.
Ula ong ba kine ki nongiakhih kila dawa ia ka jingpynshai halor ka jingkem ia ki dkhot ka KSU, ia kiba la suba donkti ha ka jingpyniap briew ha Ichamati.
U pyntip ba ki dkhot ka KSU bad ki paidbah kila ialum katto katne por hakhmat ka Thanad bad hadien ka jingpynshai, kila iapra noh la la ka jong.
Haba kyntu ia ki paid nongshongshnong ba kin burom ia ka ain, une u Heh Pulit ula ong ba kane ka jingkem bad ka jingtohkit ka dei kaba la leh kat kum ki kyndon ain.
