Shillong Lber 25: U President ka Meghalaya Pradesh Congress Committee bad u MP ka Shillong u Bah Vincent H Pala hynne ka sngi Nyngkong, ula ong ba ka jingrai ka BJP ban kyrshan ia ka National People’s Party (NPP) kan iarap pynban ia u ban jop biang ia ka elekshon MP na Shillong Parliamentary Constituency kaban long ha ka 19 tarik u Iaiong.
“Ka BJP kala leit sha ka NPP hynrei ki nongthep vote mynta kila wan sha u Pala. Kumba 80% jong ki nongthep vote ka BJP kila wan sha ka Congress. Ki nongthep vote kidei na rilum Khasi bad Jaintia” ong u Bah Pala.
Ula ong, ba ki nongkyrshan ka BJP kim sngewtynnadia ka NPP, kumta ki lah ban ym vote ia ka Congress hynrei kin vote beit ia u bah Pala.
“Ka jingshim rai ka BJP ban kyrshan ia ka NPP, kan ym ktah eiei ia nga, hynrei kan iarap kylla pynban ia nga ban jop ia ka elekshon. Kan ym iarap naka daw jong ka BJP hynrei na ka daw jong ki nongthep Vote” ong u Bah Pala.
Ula kynnoh ruh ba ka NPP kala sdang ban nguid ia ka BJP ha Meghalaya.
“Nyngkong kila pyrkhat ba ka BJP kan nguid ia ka NPP hynrei mynta ka NPP kala nguid kylla ia ka BJP. Ka bor jong ka NPP ka long kaba khlaiñ bha haduh ba kala ioh ban nguid ia ka BJP” ong u nongialam ka Congress.
U Bah Pala ula ong, ba ka BJP kala shim ia ka rai kaba bakla bha ban kyrshan ia ka NPP.
“Peit ka BJP ka thrang bha ban pynrem ia ka Congress lada ka long ha kano kano ka rukom ruh bad ka NPP ruh ka kmen bha ban ioh ia ka jingkyrshan na ka BJP hynrei ka don pat ka khep kaba lah ban pynkohnguh ia la ki briew palat ia la ka bor. Ka NPP bad ka BJP ki lah ban iadei bha ha ka kyrdan kaba halor hynrei ha ki katto katne ki kyrdan pat kin ym lah ban iadei ne ban iahap jingmut. Namar u Amit Shah hi uba la ong, ba ka Meghalaya kadei ka jylla kaba bamsap tam hapoh ka ri India bad kumno mynta ki leit pat ban ai ia ka jingkyrshan ia ki (NPP)” la kylli u Bah Pala.
