Shillong Lber 21: Ki kyrtong MP ka Congress kiban iakhun ia ka elekshon MP Lok Sabha na Shillong bad Tura Parliamentary Constituency, kin leit ban thep kyrteng ha ka 25 tarik u Lber.
Ia katei la iathuh da u President ka Meghalaya Pradesh Congress Committee Bah Vincent Pala haba iakren bad ki nongthoh khubor hadien ba la wai ka jingialang jong ka seng Congress kaba la long hynne ka sngi Palei ha nongbah Shillong.
U Bah Pala ula ong ba ka jingialang jong ka seng Congress kala shim ia ka rai ba baroh ngut ki kyrtong ka Congress kiba kynthup ia u (Bah Vincent Pala) bad u Saleng Sangma kin leit ban thep kyrteng ha ka 25 tarik u Lber ban iakhun ia ka elekshon MP Lok Sabha na Shillong bad Tura Parliamentary Constituency.
Ula iathuh ruh ba ha katei ka jingialang la pynsngewthuh ia baroh ki nongialam bad ki nongkitkam ka seng Congress ba kin long kiba adkar haka rukom kren ha ka por ialap elekshon bad ba kim dei ban kren klumar ne ban beiñ ia kiwei pat.
“Ka seng kala dep ban ai jinghikai ia ki nongialam ba kim dei ban kren klumar ne ban kren beiñ ia kiwei pat ha ka rynsan elekshon namar teng teng ngi lah ban jop bad rem tang ka jingkren, kumta ban kren klumar barabor khamtam ha kaban kynthoh ia ki kyrtong, ki nongialam bad ia kiwei kiwei ki seng saiñ pyrthei lada ngim tip bha ne ngim nud ban iengsakhi kam long kaba bha” ong u Bah Pala.
Ula ong ba ka seng kala bthah ia ki nongialam ba kidei ban leit pynsngewthuh ia ki paidbah ia ki mat kiba ka Congress kan leh lada ka wan ha ka bor ha kaba iadei bad ki .
Ula iathuh ba shen ka seng Congress kan sa pyllait noh iaka mat elekshon ki jongka bad kum u kyrtong MP ka Congress yn sa pyllait ruh ia ki mat treikam jongu shimet.
Haba kylli ia u Bah Pala la kan don jingma eiei ia u ha ka elekshon MP na ka jingmih jong ka seng VPP, u Bah Pala ula ong, ka jingmih jong ka VPP ym lah ban tip kan tuh ia ka vote jongno bad ynda la iaid ha man la ki shnong ha Sorbad Nongkyndong, yn sa sngewthuh bad yn sa ioh ia ka jingkheiñ.
“Kiba bun ki paidbah kila ong, ba ki ishu kiba ka VPP ka shim kan ym wanrah ia ka shongshngaiñ ha Meghalaya lada ngim pyrkhat bha. Ngi lah ban hap ha kajuh ka Apot kum ka jylla Manipur bad hap ha kajuh kum kiwei kiwei ki jylla ban don ka jingsngew iapher jaidbynriew hapdeng kawei ka jaidbynriew bad kawei pat ka jaidbynriew bad kiba bun ki briew ki ong ba ha ka National kan bha hi ba dang jied ia ka Congress” ong u Bah Pala.
Ula ong baroh ki kyrtong kiba iakhun ia ka elekshon kidei kiba khlaiñ suda namar ka NPP bad ka BJP ki don ha kapor bad ka UDP ka don bun ngut ki MLA bad ki MDC ki don ha ka bor khamtam ha kane ka Shillong Constitency bad wat ha Garo Hills ruh ka NPP ka don ha ka bor hynrei u kyrtong ka Congress yn sa leh bha hapoh Garo Hills.
Ia katei ka jingialang kaba la long ha Congress Bhavan, la pyniaid da u President ka MPCC u Bah Vincent Pala ha ryngkat ka jingdonlang ki nongialam kiba kynthup ia u Bah PN Syiem, u Bah Ronnie V Lyngdoh, u Dr C Lyngdoh, ki MLA, MDC bad ki nongkitkam ka seng Congres na kylleng ki Constituency.
