Tura, Lber 21 : Ka BJP ha Ri-lum Garo kala duh noh ia uwei u nongialam bala rangbah bha ha South Garo Hills hadien ba une u Nongialam uba dei u MLA barim, ula leit pyniasoh noh ialade sha ka NPP.
Une u MLA barim u dei u Samuel M Sangma, uba la pyniasoh hynne ka sngi Palei sha ka NPP.
U Samuel M Sangma u dei u MLA uba khlem shah pynrem haduh 10 snem na Baghmara, ula liem noh ha u kyrtong shimet bad hadien ula kynthih sha ka BJP tang da ki taiew shuwa ka elekshon MLA 2023.
Ka BJP kala pynieng iau Samuel na Baghmara hynrei ula shah pynliem ha u kyrtong shimet Kartush Marak, uba la iatreilang bad ka Sorkar MDA ba ialam da ka NPP hapoh ka Jylla.
Shuwa ka jingphiah constituency kaba pynlong ia u ban phet sha Baghmara Constituency, u Samuel ula bat ia ka kam MLA ka Barengapara (Dalu) constituency. U dei u associate member jong ka UDP.
Ka jingwan pyniasoh u Samuel sha ka NPP ka dei kaba kongsan bha ha kane ka elekshon Lok Sabha na Tura namar ka BJP mynta kam don nongialam shuh bad nongkyrshan ha South Garo Hills, kaba don bun ka vote.
