Shillong, Lber 21 : Ka Meghalaya Energy Power Generation Corporation Limited (MePGCL) kala pynbna ba kan khang iaid kali na ka jingkieng Umiam (Damsite) naduh ka 31 tarik Lber haduh ka 8 tarik Iaiong namar ka jingmaramot ia ka jingkieng.
La pyntip ba ha ka 31 tarik Lber, ka jingkhang ban iaid kali kan treikam tang hynriew kynta kata naduh ka por 8 baje mynstep haduh ka por 2 baje janmiet. La ong ba tang ki Ambulance yn shah ban iaid ha kane ka por.
Ka MePGCL ka pyntip ruh ba hadien bala dep pyntrei ia ka kam, yn sa plie noh ia shiliang jong ka surok ba pynnoh sha K phang jong ka wah, ba kin iaid ki kali kiba khia hapoh ka 4 ton.
Ka jingplie ia shiliang ka surok kan long ha baroh kine ki phra sngi haduh ka por 7 baje mynstep jong ka 8 tarik Iaiong.
Kala pyntip ruh ba hadien ka 8 tarik Iaiong, hadien ka por 7 baje mynstep, yn sa shah ban iaid sa ia ki kali kiba hapoh ka 15 ton na ka phang jong ka surok ba pynnoh sha ka liang ka wah.
Lah kyntu ia ki Deputy Commissioner ka East Khasi Hills bad Ri-Bhoi District ba kin ithuh ia ki jaka hashuwa ban poi sha ka dam na ka bynta ban pynieng ia ki kali hapdeng ka por 8 baje mynstep haduh 2 baje janmiet jong ka 31 tarik Lber.
La kyntu ruh ia ka Tnad PWD ba kan shong bishar bad ithuh ia kiwei pat ki lynti iaid ha ka por ka jingkhangdam ba 6 kynta ia ka jingkieng ban iaid kali ha ka 31 tarik Lber ban lah pyniaid ia kiwei pat ki kali kiba khia palat ia ka 4 ton.
