Shillong, Lber 19 : Katba ka iew ialap elekshon Lok Sabha ka dang sdang thnem, ka kyrtong ka National People’s Party (NPP) Kong M Ampareen Lyngdoh, kala buh dak jingkylli ia ki katto katne ki Nongmihkhmat paidbah kiba bam armaloi bad kam pat ba ki shakri paidbah.
Haba kren ha ka jingialang paidbah ha Mawsynram ha ka sngi Nyngkong, ka kong Ampareen kala ai nuksa ialade, da kaba pyntip ba kala iehnoh ia ka kam nonghikai hadien hynniewbnai ba ka shah jied kum ka MLA ha u snem 2009.
Kala pynpaw ruh ia ka jingsngewkhia ba ki don ki MLA kiba dang bat ia ka kam nonghikai wat hadien ba kila shah jied kum u Nongthaw Ain la palat shisnem.
“Ka jingkylli mynta ka mih, ki paidbah ki dei ban wad uei uta u MLA uba dang bat ia kam Nonghikai….ki paidbah ki dei ban wad, kiei ki kyrtong kiba bat arkam” ong ka kong Ampareen ha ka jingkren.
Halor ki jingkynthoh ba ka dei ka briew kaba thrang ia ka bor, ka Kong Ampareen kala ong ba lada ka shah jied kum ka MP, kan sa iehnoh ia ka kam MLA haba pynksan iala ka nongrim kaba iapher bad ki kyrtong ialeh pyrshah.
Kane ka jingkynthoh ka kong Ampareen kala paw kumba thalain beit beit ia u MLA ka Voice of the People’s Party (VPP) na Mawlai Bah Brightstarwelll Marbiang, uba dang bteng ban bat ia ka kam nonghikai nalor ka kam MLA bad kumjuh ruh ia u kyrtong MP ka VPP Dr Ricky Syngkon uba bat ia ka kam nonghikai.
