Shillong, Lber 19 : U National General Secretary ka NPP bad Symbud Myntri Rangbah Bah Sniawbhalang Dhar ula pynpaw ia ka jingsngewskhem ba ka NPP kan ioh ia ka jingjop na Shillong Parliamentary seat ha ka elekshon Lok Sabha ka ban long ha ka 19 tarik Iaiong.
“Ngim don jingartatien ba ngin jop ia ka elekshon” ong u Bah Sniawbha haba iakren bad ki nongthoh khubor.
Haba pynpaw ba ka bhah don vote jong ka NPP kala kiew bun bun shah, ula ong “Ka bhah don vote jong ka NPP kala kiew sha ka 3.17 lak ha u 2023. Kala nang kiew da ka jingwan pyniasoh sa ki arngut ki MLA ka PDF-Banteidor Lyngdoh bad Gavin Mylliem bad ruh ka jingwan iasoh ki MDC Bah Carnes Sohshang bad Batskhem Ryntathiang”.
Haba pyntip ba ka MDC barim ka Nongpoh, Kong Rona Khymdeit ruh kan sa wan pyniasoh sha ka NPP ha ka 22 tarik Lber, u Bah Sniawbha ula ong ba ka jingdon vote jong ka NPP kala nang kiew sa shi lak eiei.
Halor ka jingkynthoh u MP ka Congress na Shillong Bah Vincent H Pala ba ka jingpynieng ia arngut ki kyrtong kynthei da ka NPP kam dei satia ka jingpynkupbor ia ki Kynthei hynrei dei ba kam don lad da kumwei pat, une u Nongalam ka NPP ula ong ba ka party kala pynieng ia ka Myntri Sorkar kum ka kyrtong namar ka lah ban ai ka jingiakhun kaba itynnad pyrshah ia u bah Pala.
“Phi mut ngi duna ia ki kyrtong?. Ngi don ia ki kyrtong kiba biang ba biang ban iakhun pyrshah ia u. Ta ka daw ngi la iakren bad ngi la shim ia ka rai kaba dei. Ta ka daw ngi la jied ia ka Kong Ampareen namar kan sa jop biang ia ka elekshon” ula ong.
Nalor kane, u Bah Sniawbha ula kren ruh halor ki kam pynroi bapher bapher jong ka Sorkar MDA ha kine ki hynriew snem bala leit noh.
“Ki paidbah ka Meghalaya kila sakhi ba ym dei tang ka Sorkar MDA-I bad 2 kaba la shimkhia ia ki ishu kiba mih bad ka Sor kaba thymmai. Ngi ka khot tender. Phi iohi ia ki surok, ym duna ia ka T.10,000 klur la kynshew ha kine ki 6 snem. Ha ka por ba ngi shimti ia ka Sorkar, tang khyndiat ngut eh ki longiing ki don kor iing hynrei mynta palat 3 lak kila ioh kor um iing. Nalor kane, ym duna ia ka 2000 lane 3000 km ki surok thymmai la dep ban shna. Dang shen, ka Kynhun Myntri kala rai ruh ban pynpoi bording elektrik sha ki shnong bym pat don bording. Ka MDA kala kular ban kyntiew ia ki kam jngohkai, kala pynshna ia ki madan artificial turf ha jan man ki district ka Jylla” ula ong.
Une u Symbud Myntri Rangbah ka Jylla ula ong ba lada ym dei namar ka jingtreikam jong ka Sorkar, ka NPP kan ym ioh satia haduh 26 seat ha ka elekshon MLA 2023.
“Ha u 2018 ngi jop 19 seat bad ha u 2023 ngi la kiew sha ka 26 seat. Nga sngew ba kane ka dei namar ka jingtreikam bha jong ka Sorkar. Ngi tip ba ngim lah ban pynhun ia baroh namar kum ka Sorkar ngi la trei shitom ban wanrah ia ki kam pynroi khamtam haba phai sha ki samla” ula ong.
