Shillong, Lber 18: Ka Rangdajied United FC kala sdang da ka jingjop haka jingiakhun ha ka Shillong Premier League 2023 da kaba pynrem da 1-0 ia ka Nongthymmai SC ha ka jingialehkai Football kaba la long hynne ka sngi Nyngkong ha SSA Stadium, Polo, Shillong.
Ka Nongthymmai SC ka dei ka kynhun ba dang shu kiew sha ka SPL mynta u snem hadien ba kala wan baar ha ka First Division ha u snem 2022 bad ha ka jingiakhun ha ka sien kaba nyngkong ha ka SPL ka Nongthymmai SC kala ialehkai bha hynrei kam shym la lah pat ban khanglad ia u Ksankupar Khongmalai jong ka Tangdajied ban thep ia ka kol kaba itynnad ha ka minit kaba 61 ha ka kylla miet kaba la long syndon ka kol kaba la pynjop ia ka Rangdajied ia kaba ym shim la poi pyrkhat satia.
Mar ia sdang ka jingiakhun u Andyson Lapang ula ioh ia ka kabu ha ka minit kaba 17 jong ka kylla step bad ula shut ia bol hynrei u nongapkol ka Rangdajied u Banshanskhem Kharsyntiew ula ioh ban kem noh ia katei ka bol ban ym ioh rung shapoh kol.
U Bansanbha Khongsdam jong ka Rangdajied ha ka minit kaba 35 ula ioh ia ka lad ban thep ia ka kol hynrei u nongapkol ka Nongthymmai u Senapati Mandal ula ioh ban iada noh da ka kti ka jongu.
Ka jingiakhun ha ka kylla step kala kut, ha ka jingbym don kano kano ka kynhun ban ioh thep kol bad haba la bteng biang ia ka jingiakhun haka kylla miet ka Nongthymmai SC kala sdang ban ym ialehkai bha hynrei u nongapkol jongka ula ioh ban iada bunsien ia ka bol ban rung shapoh kol.
Ha ka sngi Baar ka jingiakhun ha ka SPL kan long hapdeng ka Sawmer bad ka Nangkiew Irat SC ha ka por 3 baje nohphai sngi.
Namar ka jingsiang thymmai ia u phlang plastic ne Artificial Turf ha ka Stadium bad kala don ka jingslem noh da ki bnai ban pynlong ia ka SPL, kumta ka Shillong Sports Association ryngkat bad ki 8 tylli ki kynhun ialehkai kila ia shim ia ka rai ban pynlong noh tang shi wat ia ka jingiakhun mynta u snem bad hadien kane kan sa don ka Semifinal bad ka Final.
La shim ruh ia ka rai ba na ka bynta kane ka samoi ialehkai kaba mynta, kan ym don kano kano ka jingpynhiar kyrdan ia kino kino ki kynhun ialehkai ne Club bad ha ka samoi ialehkai kaban wan kiban iashimbynta ha ka SPL kin don noh 10 tylli ki Club.
