Shillong, Nailar 05 : Ka Joint Action Committee ba pyrshah ïa ka Umngot Hydro Project mynta ka sngi ka la dawa ia ka tnad bording jong ka sorkar jylla ba kan pynmih da ka jingthoh kaba shai ban pyntikna ba ka la weng ia ka jingthmu ban tei ia ka projek bording ha katei ka thain.
Haba kren bad ki lad pathai khubor hadien ka jingialang, u Vice Chairman ka JAC, Bah Pynskhem Mukhim u la iathuh ba watla ka sorkar ka la dep ban kular ban pynduh pyndam noh ia ka jingthmu ban tei ia ka Umngot HEP hynrei ki jingthoh ba ki ïoh pdiang man ka por ki pynartatien ia ki.
“Sa shisien ngin leit ban kynduh biang ia ka sorkar ba kan pyntikna beit da ka jingthoh kaba shai ba ka la pynduh pyndam noh ia katei ka jingthmu shijunom,” bynrap biang u Bah Pynskhem.
U la iathuh ruh ba ka jingartatien bad kaba pynsyier ia ki kadei halor ka jingthoh kaba wan na ka tnad Bording ha u Rymphang mynta u snem kaba ong ba ka sorkar ka la pyndam ia ka projek bad kita ki private party.
“Kane ka mut tang ia kito ki kompeni ba ka khot tender mynswa ban pyntrei ia ka projek. Ka JAC ka kwah ba ka sorkar kan pyntikna ba kiwei kiwei ki kompeni hadien ruh kin ym lah ban pyntrei ia katei ka projek” ula ong.
Na ka liang u Bah Reachingson Kongwang, Chairman Darrang Tourism Society u la iathuh ba ka pyrthei baroh kawei bad wat u Prime Minister ka Ri u Narendra Modi ruh u la iaroh ia ka Wah Umngot kumta “Ngi ruh ngi kwah ba ka sorkar kan pynneh pynsah ia ka Wah Umngot da kaba pynduh pyndam noh ia ka projek bording”.
