Shillong Lber 16: Ki pulit ka East Khasi Hills hynne ka sngi Saitjaiñ, kila ioh ban pyllait im ia 2 ngut ki briew kiba la shah bom shnong ha ki paidbhur na ka jingkynnoh ba kidei ki menshohnoh.
Kane ka jingjia kala jia haka shnong Lawmei kaba hap ha Sohiong Constituency.
U Superintendent of Police ka East Khasi Hills u Ritiraj Ravi ula iathuh, “Ha ka por kumba 11:30 baje mynstep, arngut ki briew uwei uba la don 37 snem ka rta bad uwei uba la don 20 snem ka rta, kila shah kynnoh ba kidei ki menshohnoh bad halor katei ka jingsuba ki paidbah kiba la don kumba 200 – 300 ngut kila kem bad bom shnong ia ki”.
U SP ula ong, haba ki pulit na ka thanad kaba don ha ka thaiñ kila ioh ia ka jingtip, mardor kila leit sha katei ka shnong ban pyllait ia kine ki ar ngut, hynrei namar ba u paidbah ula bun palat, ki pulit SOT na Shillong kila leit ban hiar lang sha katei ka shnong bad kila ioh ban pyllait ia kitei ki arngut na kti ki paidbah.
“Ki pulit kila ioh ban pyllait noh ia kitei ki arngut hynrei namar ba kila mynsaw kumta la rah noh ia ki sha Sohïong CHC bad hadien kane pat lawan ialam noh sha Shillong Civil Hospital” ong u Rituraj Ravi.
Ula iathuh ruh ba ki pulit kila register case halor katei ka jingjia bad kin sa pynlong ia ka jingtohkit kaba bniah.
