Shillong, Lber 14 : Ka seng Hynniewtrep National Liberation Council (HNLC) kala kam ia ka jingdonkti halor ka jingpynbthei bomb IED kaba jia ha ka miet 9 tarik Lber ha Them Metor (Them Iew Mawlong) bad aipor ruh shibnai ia ka Sorkar ba kan pynkynriah noh ia ki 342 tylli ki Longiing ka Them Metor napoh ka thain.
“Ngi kam ia ka jingdonkti ha ka jingpynbthei bomb IED ha Them Metor ha ka miet 9 tarik Lber. Ka Budnar Shadow Squad (BSS) kaba treikam kum ka kynhun kyrpang jong ka HNLC, ka dei kaba donkti ban pynbthei ia u bomb” ong u General Secretary-cum-Publicity Secretary ka HNLC Bah Sainkupar Nongtraw ha ka kyrwoh ba phah ha ka janmiet sngi Palei.
“Ka Sorkar MDA bad ka Tnad Pulit kila kyndit ban shem ba ka kynhun jong ngi kala lah ban leh ia kum kane ka kam ha ka jaka ba khlain bha ka pahara. Ngim don jingthmu ban pynmynmaw ia ki nongshongshnong ne ki mynsiem ba lui lui, kumta ngi la ialeh ban kiar” ula ong haba dawa ia ka Sorkar Jylla ban weng noh mardor ia ki CRPF na Them Metor ban pynthkna ia ka jingioh iaid laitluid ki paid ka Bri Hynniewtrep na ka thain.
Une u Nongialam ka HNLC ula ong ruh ba ka Seng kam don lad da kumwei pat hynrei ban pyni da ka bor shipai (military action) namar ka jingpynsahteng slem palat jong ka Sorkar Jylla ban pynkynriah ia ki nongshongshnong Harijan na ka thain.
“Kane ka long kum ka jingpynkynmaw ba lada ka Sorkar kam lah ban iada ia ka Jaidbynriew jong ngi, ngi lah ban iohi ia ka thma hapoh Iing ha kane ka Bri U Hynniewtrep. Kano kano ka Jaidbynriew kaba buh jingma ia ki Hynniewtrep kin shah leh da kaba tyngeh. Ka Sorkar ka dei ban pynkynriah noh ia ki hapoh ka shibnai ne mad ia ki jingjia ki bym sngewtynnad” ula maham.
Nalor kane, u Bah Sainkupar ula kynnoh “Ki Pulit kila hiar thma ia ka Jaidbynriew jong ngi, bad ngin iada iala ka jong ka jaka bad ki briew kat kaba don ki lynti. Haba ngi iakhun na ka bynta ka daw, namar ka Jaidbynriew, kynmaw ba ngim don eiei ban duh. Ka Tnad kam pohiing ka dei kaba la pyniaid da ki bar jylla bad ki Heh Pulit Khasi kila shah pynlong kum ki ksew behthong.Haba u Heh Pulit bar jylla u ong wiar, ki wiar, haba ki ong dait, ki dait. Haba ki ong talain tdong, ki talain, haba ki ong jaw snam, ki jaw snam na ka bynta ki bar jylla. Hynrei haba phai pat shaka jingiada ia ka jaidbynriew Hynniewtrep na ka jingshah pynlong langknia bad shah thombor palat liam ha ki bar Jylla lane ki Pulit bar jylla, kim don bniat satia lane ka snam ban jaw”.
Nalor kane, ka HNLC kala kynnoh ruh ia ki arngut ki Symbud Myntri Rangbah ka Jylla-Bah Prestone Tynsong bad Bah Sniawbhalang Dhar, ba ki shah pyniaid ha ki Nongialam Garo-Mukul Sangma bad Conrad K Sangma.
 kala kam ia ka jingdonkti halor ka jingpynbthei bomb IED kaba jia ha ka miet 9 tarik Lber ha Them Metor (Them Iew Mawlong) bad aipor ruh shibnai ia ka Sorkar ba kan pynkynriah noh ia ki 342 tylli ki Longiing ka Them Metor napoh ka thain.){kind=link}