Guwahati, Lber 14 : U Nongialam bala rangbah bha ka Congress ha Assam u Suruj Dehingia, ula leit ban pyniasoh noh ialade sha ka BJP hadien ka jingshah pynduh ia ka ticket elekshon Lok Sabha ban wan.
Une u Nongialam ka Congress ula dawa ban iakhun na Jorhat Constituency, ha kaba ka Congress kala pynieng pynban ia u Gaurav Gagoi. U Dehingia ula leit pyniasoh ialade ha ka jingialang bala pynlong da ka BJP ha Guwahati hynnin ka sngi Balang ha ka jingiadonlang u MP ka Rajya Sabha Pabitra Margherita bad kiwei ki Myntri Sorkar.
Kaba thamula ka long ba ka Congress ruh kala beh seng ia u Dehingia khlem da ai kano kano ka daw. U Gaurav Gagoi, uba dei u dei u Deputy Leader ha Lok Sabha, un iakhun pyrshah ia u MP ka BJP Topon Kumar Gagoi na Jorhat.
Lah ban kdew hangne ba napdeng ki 14 seat ha Assam, ka Congress kala pynbna ia 12 ngut ki kyrtong bad tyrwa ia ka Dibrugarh seat sha ka Assam Jatiya Parishad. Ka BJP kala pynbna kyrteng ia 11 ngut ki kyrtong bad ieh ia lai tylli ki seat sha ka AGP bad ka UPPL.
Ha kane ka elekshon bala dep, ka BJP kala ioh 9 ngut ki MP, katba ka AGP bad ka UPPL kim shym la ioh jingjop. Ka Congress kala jop 3 seat bad ka AIUDF kala ioh kawei lem bad uwei u MP shimet.
